ଗଜପତି: ଗୁମ୍ମା ବ୍ଲକର ନାମନଗଡ- ଅଜୟଗଡ ରାସ୍ତାରେପାହାଡ ଧସି ରାସ୍ତା ଅବରୋଧ ହୋଇଛି । ପ୍ରବଳ ବର୍ଷା ଯୋଗୁଁ ଏହି ରାସ୍ତାରେ ମାଟି ଅତଡ଼ା ଖସିଛି । ଏବେବି ଜିଲ୍ଲାରେ ପ୍ରବଳ ବର୍ଷା ଲାଗି ରହିଛି । ବର୍ଷା ଲାଗି ରହିଛି ଆଗକୁ ସ୍ଥିତି ଉପରେ ନଜର ରଖିଛି ପ୍ରଶାସନ । ବର୍ତ୍ତମାନ ସୁଦ୍ଧା ରାସ୍ତା ଖୋଲି ପାରିନାହିଁ । ଆଜି ମଧ୍ୟରାତ୍ରି ସୁଦ୍ଧା ସାମୁଦ୍ରିକ ଝଡ଼ବାତ୍ୟା 'ଗୁଲାବ' ଲ୍ୟାଣ୍ଡଫଲ କରିବା ନେଇ ପୁର୍ବାନୁମାନ କରିଛି ପାଣଇପାଗ ବିଭାଗ । ଏହାକୁ ନେଇ ଗଜପତି ପ୍ରଶାସନ ପୂର୍ଣ୍ଣ ପ୍ରସ୍ତୁତ ହୋଇ ରହିଥିବା ସୂଚନା ଦେଇଛି ।
ପ୍ରତିବର୍ଷ ବର୍ଷା ହେଲେ ଏହି ରାସ୍ତାପାର୍ଶ୍ବରେ ଥିବା ପାହାଡ଼ରୁ ମାଟି ଅତଡ଼ା ଖସିପଡ଼େ । ଫଳରେ ସ୍ଥାନୀୟ ଲୋକଙ୍କୁ ନାହିଁନଥିବା ସମସ୍ୟାର ସମ୍ମୁଖୀନ ହେବାକୁ ପଡ଼େ । ବର୍ଷା ହେଲେ ଏହି ରାସ୍ତା ଦେଇ ଯାତାୟତ କରିବାକୁ ସ୍ଥାନୀୟ ଲୋକେ ଭୟ ପ୍ରକାଶ କରୁଛନ୍ତି । ଏହାକୁ ନେଇ ପ୍ରଶାସନ ପକ୍ଷରୁ ମଧ୍ୟ କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ଏହି ରାସ୍ତା ଉପରେ ସ୍ଥାନୀୟ ଅଞ୍ଚଳର ୭ଟି ଗାଁ ନିର୍ଭରଶୀଳ । ପାରଳାଖେମୁଣ୍ଡିକୁ ସଂଯୋଗ କରୁଛି ଏହି ରାସ୍ତା । ଶନିବାର ରାତିରୁ ମାଟି ଅତଡ଼ା ଖସି ପଡ଼ିଛି । ଫଳରେ ରାସ୍ତା ଦେଇ ବାଇକ ଟିଏ ମଧ୍ୟ ଯାଇ ପାରୁନାହିଁ ।