ଗଜପତି: "ଜହ୍ନି ଫୁଲ ଠୋ ଠା କାକୁଡି ଫୁଲ ଠୋ ଠା । ଯେ ନ ଦେବ ତା ପିଲା ର ନାକ ଟା ଖଣ୍ଡିଆ ଟା" । ଜହ୍ନି ଲୋ ଜହ୍ନି, ଜହ୍ନି ଆଞ୍ଜୁଳି ନିତି ପୂଜା କଲେ ତିନି ଆଞ୍ଜୁଳି । କୁଆଁରୀମାନଙ୍କ ପୂଜା ଜହ୍ନିଓଷା । ଭାଦ୍ରବ ପୂର୍ଣ୍ଣିମା ଠାରୁ ଆରମ୍ଭ ହୋଇଥିବା ଏହି ପୂଜା କୁମାର ପୁର୍ଣ୍ଣିମାରେ ଶେଷ ହୋଇଥାଏ । ପରିବାରରେ ସୁଖ, ଭାଇର ମଙ୍ଗଳ କାମନା ସହ ଭଲ ବର ପାଇବା ପାଇଁ ଗଜପତି ଜିଲ୍ଲାର କୁଆଁରୀ ଝିଅମାନେ ପାଳନ କରିଥାନ୍ତି ଜହ୍ନି ଓଷା । ସନ୍ଧ୍ୟା ହେଲେ ଗୀତ ଘଣ୍ଟି, ହୁଳହୁଳି ଶବ୍ଦରେ ପ୍ରକମ୍ପିତ ହୋଇଉଠେ ପୁରପଲ୍ଲୀ ।
ଜହ୍ନିଓଷାର ବିଧି:ଭାଦ୍ରବ ପୂର୍ଣ୍ଣିମା ଠାରୁ ଆରମ୍ଭ ହୋଇଥିବା ଏହି ଓଷା । ଏକ ମାସ ଧରି ପାଳନ କରାଯାଉଥିବା ଏହି ଓଷା ସମୟରେ ବ୍ରତଧାରୀ କୁଆଁରୀମାନେ ମା’ ବୃନ୍ଦାବତୀଙ୍କ ନିକଟରେ ପୂଜା କରିବା କରିଥାନ୍ତି । ଏହି ସମୟରେ ବ୍ରତଧାରୀ କୁଆଁରୀ ମାନେ ମା' ବୃନ୍ଦାବତୀଙ୍କ ନିକଟରେ ପୂଜା କରିବା ସହ ଗୋଟିଏ ଓଳି ସାତ୍ତ୍ବିକ ଭୋଜନ କରିଥାନ୍ତି । ଏହି ବ୍ରତ ସମୟରେ ଜହ୍ନି ଖାଇବା କିମ୍ବା ଜହ୍ନି ଫୁଲ ତୋଳିବା ମନା ହୋଇଥାଏ । ଯଦିଓ ମାଁଙ୍କୁ ଜହ୍ନି ଫୁଲ ଦେଇ ପୂଜା କରାଯାଇଥାଏ ତଥାପି ଅନ୍ୟ କେହି ଏହାକୁ ତୋଳି ଆଣିଥାନ୍ତି । ପ୍ରତିଦିନ ସକାଳେ ଉଠି ନିତ୍ୟକର୍ମ ସାରି ବୃନ୍ଦାବତୀଙ୍କ ନିକଟରେ ଜଳ ପ୍ରଦାନ କରିବା ପରେ ହିଁ ଅନ୍ୟ କିଛି କାର୍ଯ୍ୟ କରିଥାନ୍ତି ବ୍ରତଧାରିମାନେ । ତେବେ ଦଶହରା ଠାରୁ ନୂଆଁ ଚାଙ୍ଗୁଡିରେ ନଦୀବାଲି ରଖି 7ପ୍ରକାର ଡାଲି ଜାତୀୟ ପଦାର୍ଥ ବୁଣିଥାନ୍ତି ଏବଂ ମାନସିକ କରି ନଡିଆ ଓ କଦଳି ବାନ୍ଧିଥାନ୍ତି । ଶେଷରେ କୁମାର ପୁର୍ଣ୍ଣିମା ଦିନ ଚନ୍ଦ୍ର ପୂଜା ସହ ଓଷା ଉଦଯାପନ ହୋଇଥାଏ । ପୌରାଣିକ କଥା ଅନୁଯାୟୀ ଶିବଙ୍କୁ ପାଇବା ପାଇଁ ପାର୍ବତୀ ଏହି ଓଷା କରିଥିଲେ । ଏହି ଓଷା କରିବା ପାରେ ମା’ଙ୍କୁ ଶିବ ପ୍ରାପ୍ତ ହୋଇଥିଲେ ।