ଗଜପତି: ହାତରେ ମେହେନ୍ଦି, ପାଦରେ ଅଳତା ଲଗାଇ ବିବାହ ପାଇଁ ପ୍ରସ୍ତୁତ ହୋଇଥିଲା କନ୍ୟା । ଆଉ କିଛି ସମୟରେ ହାତକୁ ଦି ହାତ ହୋଇଥାନ୍ତା । ହେଲେ ଶେଷ ସମୟରେ ସବୁ ହୋଇଗଲା ଓଲଟପାଲଟ । ବିବାହସ୍ଥଳରେ ପହଞ୍ଚି ବିବାହକୁ ଭଣ୍ଡୁର କଲା ଚାଇଲ୍ଡ ଲାଇନ । ଗଜପତି ଜିଲ୍ଲା ଗୋଷାଣୀ ବ୍ଲକର କେରାଣ୍ଡି ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି ।
ସୂଚନା ଅନୁଯାୟୀ, ଆଜି(ଗୁରୁବାର) କେରାଣ୍ଡି ଗାଁରେ ଏକ ବିବାହର ଆୟୋଜନ ହେଉଥିଲା । ହେଲେ କନ୍ୟା ନାବାଳିକା ହୋଇଥିବା ଖବର ଚାଇଲ୍ଡ ଲାଇନ ପାଖରେ ପହଞ୍ଚିବା ପରେ ନାବାଳିକା ଘରେ ପହଞ୍ଚି ଜନ୍ମଗତ ପ୍ରମାଣ ମାଗିଥିଲେ ଚାଇଲ୍ଡ ଲାଇନର ସଦସ୍ୟ । ଜନ୍ମପତ୍ର ଯାଞ୍ଚ ପରେ କନ୍ୟାକୁ 18 ବର୍ଷ ହୋଇ ନଥିବା ଜଣାପଡିବା ପରେ ବାହାଘରକୁ ବନ୍ଦ କରିଥିଲା ଚାଇଲ୍ଡ ଲାଇନ । ପରେ ଝିଅକୁ 18 ବର୍ଷ ହେବା ପରେ ବିବାହ କରିବେ ବୋଲି କନ୍ୟାର ପିତାମାତା ଲିଖିତ ପ୍ରତିଶୃତି ଦେଇଥିବା କହିଛନ୍ତି ସିଡିପିଓ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ