ଢେଙ୍କାନାଳରେ ବୀଭତ୍ସ ହତ୍ୟାକାଣ୍ଡ: ଗାଁ ଦାଣ୍ଡରେ ଯୁବକଙ୍କ ଗଣ୍ଡି-ମୁଣ୍ଡ ଅଲଗା କଲେ ଦୁର୍ବୃତ୍ତ

ଢେଙ୍କାନାଳ ସଦର ଥାନା ଅନ୍ତର୍ଗତ ନମିଚିରାରେ ବୀଭତ୍ସ ହତ୍ୟାକାଣ୍ଡ । ଗାଁ ଦାଣ୍ଡରେ ଯୁବକଙ୍କୁ ହାଣି ମୁଣ୍ଡ ଗଣ୍ଡି ଅଲଗା କରି ଫେରାର । ସଦର ପୋଲିସର ତଦନ୍ତ ଆରମ୍ଭ । ଅଧିକ ପଢନ୍ତୁ

ଢେଙ୍କାନାଳ: ଜିଲ୍ଲା ସଦର ଥାନା ଅନ୍ତର୍ଗତ କଙ୍କଡାହାଡ଼ ପଞ୍ଚାୟତର ନମିଚିରା ଗ୍ରାମରେ ଘଟିଛି ବୀଭତ୍ସ ହତ୍ୟାକାଣ୍ଡ । ଏହି ଗ୍ରାମର ମଣ୍ଡପ ନିକଟରେ ଜଣେ ଯୁବକଙ୍କୁ ବୀଭତ୍ସ ଭାବେ ହତ୍ୟା କରାଯାଇଛି । ମୃତ ଯୁବକ ସ୍ଥାନୀୟ କଙ୍କଡା ହାଡ଼ ଗ୍ରାମର ବିଜୁ ବେହେରା ବୋଲି ଜଣାପଡିଛି । ବିଜୁ ବେହେରା କଙ୍କଡାହାଡ଼ ୱାର୍ଡ ନଂ-୪ର ୱାର୍ଡମେମ୍ବର ଥିବା ଜଣାପଡିଛି । କୌଣସି ଧାରୁଆ ଅସ୍ତ୍ରରେ ବେକ ଅତି ନୃଶଂସ ଭାବେ ହାଣିଥିବାରୁ ମୁଣ୍ଡ ଗଣ୍ଡି ଅଲଗା ହୋଇଯାଇଛି ।

ଆଜି(ଶନିବାର) ସନ୍ଧ୍ୟାରେ ବିଜୁ ନମିଚିରା ଗାଁ ନିକଟରେ ଥିବା ତାଙ୍କର ଧାନ ଜମିକୁ ଜଗିବାକୁ ଯାଇଥିବାବେଳେ ତାଙ୍କୁ ହତ୍ୟା କରାଯାଇଛି । ତେବେ କିଏ ଓ କାହିଁକି ତାଙ୍କୁ ହତ୍ୟା କରିଛନ୍ତି ତାହା ସଠିକ ଜଣାପଡିନାହିଁ । ସଦର ପୋଲିସ ପହଞ୍ଚି ଘଟଣାସ୍ଥଳରେ ତଦନ୍ତ ଆରମ୍ଭ କରିଛି । ତେବେ ହତ୍ୟାକାଣ୍ଡ ପରେ ଦୁର୍ବୃତ୍ତ ଫେରାର ହୋଇଯାଇଥିବାବେଳେ ପୂର୍ବ ବିବାଦରୁ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଇଛି ।

ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ