ଢେଙ୍କାନାଳ: ଖାଦ୍ୟରେ ଅତ୍ୟଧିକ ମାତ୍ରାରେ ନିଦ ବଟିକା ଦେଇ ଶାଶୁକୁ ମାରିଦେଲା ବୋହୂ । ଢେଙ୍କାନାଳ ଜିଲ୍ଲା ରାସୋଳ ବ୍ରାହ୍ମଣ ସାହିରେ ଏପରି ଅଭାନୀୟ ଘଟଣା ଦେଖାଦେଇଛି । ଏନେଇ ଖୋଦ୍ ମୃତ ମହିଳାଙ୍କ ପୁଅ ପତ୍ନୀ ବିରୋଧରେ ହତ୍ୟା ଅଭିଯୋଗ ଆଣିଛନ୍ତି । ଘଟଣା ସମ୍ପର୍କରେ ଖବର ପାଇ ପୋଲିସ ପହଞ୍ଚି ତଦନ୍ତ କରିବା ସହ ଥାନାରେ ବୋହୂକୁ ଗିରଫ କରିଥିବା ସୂଚନା ମିଳିଛି । ମୃତ ମହିଳା ଜଣକ ହେଉଛନ୍ତି ରାସୋଳ ବ୍ରାହ୍ମଣ ସାହିର ଅବସରପ୍ରାପ୍ତ ରାଜସ୍ୱ ନିରୀକ୍ଷକ ତାରେଶ୍ୱର ସରଙ୍କ ପତ୍ନୀ ୬୨ ବର୍ଷୀୟ ସୁଲୋଚନା ସର ।
ଅଭିଯୋଗ ଅନୁଯାୟୀ, ଗତ ଗୁରୁବାର ଦ୍ୱିପ୍ରହରରେ ବୋହୂ ତୃପ୍ତିମୟୀ ତାଙ୍କ ସୁଲୋଚନାଙ୍କୁ ଖାଦ୍ୟରେ ଅତ୍ୟଧିକ ନିଦ ବଟିକା ଦେଇ ଦେଇଥିଲେ । ଫଳରେ ରାତି ପ୍ରାୟ ୮ଟା ସମୟରେ ତାଙ୍କ ପାଟିରୁ ରକ୍ତ ଓ ଫେଣ ବାହାରି ତାଙ୍କର ମୃତ୍ୟୁ ଘଟିଥିଲା । ତାଙ୍କୁ ସ୍ଥାନୀୟ ରାସୋଳ ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରାଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ସୁଲୋଚନା ସମ୍ପୂର୍ଣ୍ଣ ସୁସ୍ଥ ଥିଲେ ଏବଂ ଘଟଣା ଦିନ ପୁଅ ଜୟନ୍ତଙ୍କ ସହ ବ୍ୟାଙ୍କ ଯାଇ ଘରକୁ ଫେରିବା ପରେ ଖାଇ ଶୋଇଥିଲେ । ମାତ୍ର ତାଙ୍କର ଏପରି ଆକସ୍ମିକ ମୃତ୍ୟୁକୁ ଗ୍ରାମବାସୀ ଓ ସମ୍ପର୍କୀୟ ସହଜରେ ଗ୍ରହଣ କରୁନାହାନ୍ତି । ଅନ୍ୟପଟେ ସୁଲୋଚନାଙ୍କୁ ତାଙ୍କ ସ୍ତ୍ରୀ ହତ୍ୟା କରିଥିବା ପୁଅ ଅଭିଯୋଗ କରିଛନ୍ତି । ସେ କହିଛନ୍ତି, " ପୂର୍ବରୁ ତୃପ୍ତିମୟୀ ନିଜ ଶାଶୁଙ୍କୁ ନିର୍ଯାତନା ଦେଉଥିଲେ । ଏବେ ଖାଦ୍ୟରେ ବିଷ ମିଶାଇ ମାରି ଦେଇଛନ୍ତି । ସମ୍ପତ୍ତି ଲୋଭରେ ପତ୍ନୀ ଖାଦ୍ୟରେ ନିଶା ବଟିକା ମିଶାଇ ମାଆକୁ ମାରି ଦେଇଛି ।" ତେବେ ମାଆଙ୍କ ହତ୍ୟା ଅଭିଯୋଗ କରି ସେ ଖୋଦ୍ ରାସୋଳ ଥାନାରେ ପତ୍ନୀ ବିରୋଧରେ ଅଭିଯୋଗ କରିଛନ୍ତି ଏବଂ ଏଥିରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।