ଢେଙ୍କାନାଳ: ଜିଲ୍ଲାର ରାସୋଳ ସ୍ଥିତ ଓଡିଶା ଗ୍ରାମ୍ୟ ବ୍ୟାଙ୍କ ଡକାୟତି ଘଟଣାରେ ପୋଲିସ ସନ୍ଦେହ ଜନକ ଭାବେ ଏକ କାର ଓ ବୁଲେଟକୁ ଜବତ କରିଛି । ଏହି କାର ଓ ବୁଲେଟକୁ ଢେଙ୍କାନାଳ ଗୋବିନ୍ଦପୁର ଫାଣ୍ଡି ପୋଲିସ ଧରିବାରେ ସକ୍ଷମ ହୋଇଛି । କାର ଭିତରୁ କିଛି ସୁନା ଅଳଙ୍କାର ଓ ଟଙ୍କା ମଧ୍ୟ ପୋଲିସ ଉଦ୍ଧାର କରିଥିବା ସୂଚନା ମିଳିଛି । ତେବେ କେତେ ଓଜନର ଅଳଙ୍କାର ଓ କେତେ ପରିମାଣର ଟଙ୍କା ତାହା ତଦନ୍ତ ପରିସରରେ ଥିବାରୁ ପୋଲିସ ଗୋପନ ରଖିଛି । ଏ ସମ୍ପର୍କରେ ପୋଲିସ ତିନି ଜଣଙ୍କୁ ଅଟକ ରଖି ପଚରାଉଚରା ଜାରି ରଖିଛି ।
ସୂଚନା ଥାଉକି, ସେପଟେ ରାସୋଳ ସ୍ଥିତ ଓଡିଶା ଗ୍ରାମ୍ୟ ବ୍ୟାଙ୍କରେ ବୁଧବାର ଅପରାହ୍ନ ପ୍ରାୟ ସାଢ଼େ ତିନିଟା ସମୟରେ ଦୁଇଟି ବୁଲେଟରେ ୪ ଜଣ ମୁଖା ପିନ୍ଧା ଦୁର୍ବୃତ୍ତ ପିସ୍ତଲ ଓ ଛୁରି ଧରି କର୍ମଚାରୀଙ୍କୁ ଭୟଭୀତ କରିଥିଲେ । ପରେ ଲକର ଖୋଲି ପ୍ରାୟ ୭ ଲକ୍ଷ ଟଙ୍କା ଓ କୋଟିଏ ତାଙ୍କର ସୁନା ଅଳଙ୍କାର ଲୁଟିନେଇ ପଳାଇଯାଇଥିଲେ । ଫଳରେ ଏହି ଡକାୟତି ଘଟଣାରେ ଜିଲ୍ଲା ବ୍ୟାପି ପୋଲିସକୁ ଆଲର୍ଟ କରାଯାଇଥିଲା । ଏପରି ସ୍ଥିତିରେ ଗୋବିନ୍ଦପୁର ଫାଣ୍ଡି ନିକଟରେ ଏହି କାରକୁ ସନ୍ଦେହ ହେବାରୁ ପୋଲିସ ଚଢ଼ାଉ କରିଥିଲେ ।