ଢେଙ୍କାନାଳ: ଜିଲ୍ଲା ଭାପୁର ଧାନ ମଣ୍ଡି ସମ୍ମୁଖରେ ଧାନ ବସ୍ତା ଥୋଇ ପୁରୁଣା କଟକ ସମ୍ବଲପୁର ରାସ୍ତାକୁ ତିନି ଘଣ୍ଟା ଧରି ଅବରୋଧ କଲେ ଚାଷୀ । ଧାନ ମଣ୍ଡିରେ କଟନୀ ଛଟନୀକୁ ନେଇ ଉତ୍ତେଜନା । ଏପରିକି ଧାନବସ୍ତା ଥୋଇ ଚାଷୀ ରାଜରାସ୍ତାକୁ ଓହ୍ଲାଇଛନ୍ତି । ଯାହାକୁ ନେଇ ଧାନ ମଣ୍ଡି ଅଚଳ ହୋଇ ପଡ଼ିଥିବାବେଳେ ସେପଟେ ରାସ୍ତା ଅବରୋଧ ଯୋଗୁଁ ସାଧାରଣ ଲୋକେ ମଧ୍ୟ ହନ୍ତସନ୍ତ ହୋଇଛନ୍ତି ।
ଢେଙ୍କାନାଳ ଜିଲ୍ଲା ସଦର ବ୍ଲକ ଅନ୍ତର୍ଗତ ଭାପୁର ଧାନ ମଣ୍ଡିରେ ବ୍ୟାପକ ଅବ୍ୟବସ୍ଥା । ଆଜି ଏହି ଭାପୁର ଅଞ୍ଚଳରେ ୪ଟି ମଣ୍ଡି ବଦଳରେ ମାତ୍ର ଗୋଟିଏ ମଣ୍ଡି ଆରମ୍ଭ ହୋଇଥିଲା । ତେବେ ଏହି ଭାପୁର ମଣ୍ଡିରୁ ଧାନ ନେବାପାଇଁ ନିୟୋଜିତ ମିଲର ଓ ସମବାୟ ସମିତି ସମ୍ପାଦକଙ୍କ ସଲାସୁତୁରାରେ କୁଇଣ୍ଟାଲରେ ଚାରି ପାଞ୍ଚ କିଲୋଗ୍ରାମ କାଟିବା ସହ ଓ ଧାନ ବସ୍ତା ଦେବାକୁ ମିଲର ମନା କରିଥିଲେ । ଯାହାକୁ ନେଇ ଧାନ ଦେବାକୁ ଆସିଥିବା ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା । ରାଇସ ମିଲର ଏପରି ମନମାନି ନେଇ ଚାଷୀମାନେ ଆନ୍ଦୋଳନକୁ ଓହ୍ଲାଇବାକୁ ବାଧ୍ୟ ହୋଇଥିଲେ । ଫଳରେ ଉତ୍ତ୍ୟକ୍ତ ଚାଷୀମାନେ ଧାନବସ୍ତାକୁ ଭାପୁର ପଞ୍ଚାୟତ ତଥା ମଣ୍ଡି ସମ୍ମୁଖ ରାସ୍ତାରେ ଥୋଇ ଅବରୋଧ କରିଥିଲେ ।