ଢେଙ୍କାନାଳ: ଜିଲ୍ଲା କାମାକ୍ଷାନଗର ରେକୁଳା ପାନୀୟ ଜଳ ଯୋଗାଣ ପମ୍ପ ହାଉସରୁ ଲୁଟ୍ । ଗତକାଲି(ସୋମବାର) ବିଳମ୍ବିତ ରାତ୍ରିରେ ଡ୍ୟୁଟିରେ ଥିବା କର୍ମଚାରୀଙ୍କୁ ମାଡ ମାରି ୩ ଲକ୍ଷ ଟଙ୍କାର ପାଇପ ଏବଂ କର୍ମଚାରୀଙ୍କ ମୋବାଇଲ ଓ ସୁନା ଚେନ ଲୁଟି ନେଇଥିବା ଅଭିଯୋଗ ହୋଇଛି ।
ସହରକୁ ପିଏଚଡି ବିଭାଗ ତରଫରୁ ନୂତନ ପାଣି ପାଇପ ସଂଯୋଗ ପାଇଁ ରଖାଯାଇ ଥିବାବେଳେ ଦୁର୍ବୃତ୍ତମାନେ ଏହାକୁ ଲୁଟିନେଇଛନ୍ତି । ପ୍ରାୟ ୭୦ ରୁ ଊର୍ଦ୍ଧ୍ବ ପାଇପ ଲୁଟ ହୋଇଥିବା କହିଛନ୍ତି ଡ୍ୟୁଟିରେ ଥିବା କର୍ମଚାରୀ । ରାତି ପ୍ରାୟ ୧ ଟା ବେଳକୁ ୨୦ ରୁ ଅଧିକ ଦୁର୍ବୃତ୍ତ ଆସି ପମ୍ପ ହାଉସରେ ଥିବା ପମ୍ପ ଡ୍ରାଇଭର ଶ୍ରୀଧର ବେହେରା ଓ ପ୍ରଦୀପ୍ତ ବେହେରାଙ୍କୁ ହାତ ଗୋଡ ବାନ୍ଧିବା ସହିତ ମାଡ ମାରିଥିଲେ । ଏହାପରେ ରଖା ଯାଇଥିବା ପାଇପକୁ ଗାଡିରେ ନେଇ ଫେରାର ହୋଇ ଯାଇଛନ୍ତି । ଖବର ପାଇ ଘଟଣାସ୍ଥଳରେ କାମାକ୍ଷାନଗର ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
