4କୋଟି ମୂଲ୍ୟର ଚାନ୍ଦିରେ ଝଟକୁଛନ୍ତି ଧନଦାତ୍ରୀ

ଚାନ୍ଦିର ଚମକରେ ଚମକୁଛନ୍ତି ମା' ଗଜଲକ୍ଷ୍ମୀ । ଚଳିତ ବର୍ଷ ଢେଙ୍କାନାଳରେ ୪ କୋଟି ଟଙ୍କାର ଚାନ୍ଦି ୨୦ ଲକ୍ଷରୁ ଉର୍ଦ୍ଧ ଟଙ୍କାର ସୁନା ଗହଣାରେ ଶୋଭା ପାଉଛନ୍ତି ଧନଦାତ୍ରୀ ।

ଢେଙ୍କାନାଳ: କୁମାର ପୂର୍ଣ୍ଣିମା ଠାରୁ ଆରମ୍ଭ ହୋଇଥିବା ଢେଙ୍କାନାଳର ପ୍ରସିଦ୍ଧ ଗଜଲକ୍ଷ୍ମୀ ପୂଜା ୧୧ ଦିନ ଧରି ବେଶ ଧୂମଧାମରେ ପାଳନ କରୁଛନ୍ତି ଢେଙ୍କାନାଳବାସୀ । ରଙ୍ଗିନ ଆଲୋକମାଳା ସାଙ୍ଗକୁ ପୂଜା ପ୍ରତିଷ୍ଠାନର ସାଜସଜାରେ ସଂପୂର୍ଣ୍ଣ ସହର ଝଲସି ଉଠିଛି । ତେବେ କେତେକ ପୂଜା ମଣ୍ଡପରେ ପ୍ରସ୍ତୁତ ଚାନ୍ଦି ମେଢ ଆଉ ମା'ଙ୍କ ପାଖରେ ଲାଗିଥିବା ସୁନା ଅଳଙ୍କାର ଦର୍ଶକ ମାନଙ୍କୁ ବେଶ ଆକର୍ଷିତ କରୁଛି ।

ଚଳିତ ବର୍ଷ ୩୮ ଟି ମଣ୍ଡପରେ ମା'ଙ୍କ ମୃଣୟୀ ମୂର୍ତ୍ତି ପୂଜା ପାଉଛନ୍ତି । ସେମାନଙ୍କ ମଧ୍ୟରୁ 4ଟି ପୂଜାମଣ୍ଡପରେ ମା ଚାନ୍ଦିମେଢରେ ଦର୍ଶନ ଦେଉଛନ୍ତି । ତେବେ ୧୧ ଦିନ ଧରି ବନ୍ଧୁ ବାନ୍ଧବଙ୍କ ମେଳରେ ଢେଙ୍କାନାଳବାସୀ ଏହି ପୂଜା ଉତ୍ସବକୁ ବେଶ ଧୁମଧାମରେ ପାଳୁଛନ୍ତି । ପୂଜା ପ୍ରତିଷ୍ଠାନମାନଙ୍କ ପକ୍ଷରୁ ଆଲୋକ ସଜା ଠାରୁ ଆରମ୍ଭ କରି ନଭଚୂମ୍ଭୀ ତୋରଣ ଓ ମଣ୍ଡପର ସାଜସଜା ଚଳିତ ବର୍ଷ ବେଶ୍‌ ମନୋରମ ହୋଇଛି । ପୂଜା ବଜାରରେ ସୁସ୍ବାଦୁ ଖାଦ୍ୟ ସାଙ୍ଗକୁ ବିଭିନ୍ନ ଦୋଳିର ମଜା ନେଉଛନ୍ତି ଦର୍ଶକ ।

ସହରରେ ଚଳିତ ବର୍ଷ ମୁଖ୍ୟ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି ମୀନା ବଜାର ପୂଜା ମଣ୍ଡପ । ଏଠାରେ 1961 ମସିହାରୁ ମା ଗଜଲକ୍ଷ୍ମୀଙ୍କ ଚାନ୍ଦିମେଢ କରାଯାଉଛି । ଅପର ପକ୍ଷରେ ଏହି ମଣ୍ଡପରେ ମା' ରାଜଲକ୍ଷ୍ମୀଙ୍କ ସୁନା ମୁକୁଟ, ହାର, କିରିଟ ଓ ଚିତା ଆଦି ଠାରୁ ସଖିଙ୍କର ହାର ଆଦି ସୁନା ଅଳଙ୍କାରର ଓଜନ ଅନୁନ୍ୟ ସାଢେ ଚାରି କିଲୋଗ୍ରାମର ଥିବାବେଳେ ଯାହାର ଆନୁମାନିକ ମୂଲ୍ୟ ୧୮ ଲକ୍ଷରୁ ଉର୍ଦ୍ଧ୍ବ ପୂଜା ମଣ୍ଡପ କର୍ତ୍ତୃପକ୍ଷ କହିଛନ୍ତି । ଚଳିତ ବର୍ଷ ଢେଙ୍କାନାଳ ଗଜଲକ୍ଷ୍ମୀ ପୂଜାରେ ୪ କୋଟିରୁ ଉର୍ଦ୍ଧ୍ବ ଟଙ୍କାର ଚାନ୍ଦିରେ ମା' ଲକ୍ଷ୍ମୀ ଶୋଭା ପାଉଥିବା ବେଳେ ୨୫ ଲକ୍ଷ ଟଙ୍କାର ସୁନା ଅଳଙ୍କାରରେ ଆଭୂଷିତ ହୋଇଥିବା ନେଇ କହିଛନ୍ତି ପୂଜା କମିଟି କର୍ତ୍ତୃପକ୍ଷ ।

ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ