ଢେଙ୍କାନାଳରେ ଅବକାରୀ ବିଭାଗର ଚଢ଼ାଉ, ୧୦୦ରୁ ଉର୍ଦ୍ଧ୍ବ ଲିଟର ଦେଶୀ ମଦ ଜବତ

ଢେଙ୍କାନାଳ ଜିଲ୍ଲାପାଳଙ୍କ ନିର୍ଦ୍ଦେଶରେ କଙ୍କଡ଼ାହାଡ଼ର ବିଭିନ୍ନ ସ୍ଥାନରେ ଅବକାରୀ ବିଭାଗର ଚଢ଼ାଉ । ୧୦୦ରୁ ଉର୍ଦ୍ଧ୍ବ ଲିଟର ଦେଶୀ ମଦ, ୬୩ଟି ବିଦେଶୀ ମଦ ଓ ମଦ ପାଇଁ ବ୍ୟବହାର ଡେକଚି ଓ ଡ୍ରମକୁ ଜବତ କରିଛି ଅବକାରୀ ବିଭାଗ ।

ଢେଙ୍କାନାଳ: ଜିଲ୍ଲା ମୋବାଇଲ ସ୍କ୍ୱାର୍ଡ ଓ କାମାକ୍ଷାନଗର ଅବକାରୀ ବିଭାଗ ମିଳିତ ଚଢ଼ାଉ କରିଛନ୍ତି । ଢେଙ୍କାନାଳ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଏହି ଚଢାଉ ହୋଇଥିବା ସୂଚନା ମିଳିଛି । ଜିଲ୍ଲା ଅବକାରୀ ଅଧିକ୍ଷକ ମନୋଜ ସେଠୀଙ୍କ ତତ୍ୱବାଧାନରେ କାମାକ୍ଷାନଗର ଏସଆଇ ସ୍ବପ୍ନରାଣୀ ସାହୁ ଓ ଏଏସଆଇ ଶ୍ରୀକାନ୍ତ ପଟ୍ଟନାୟକ କଙ୍କଡ଼ାହାଡ଼ର ବିଭିନ୍ନ ସ୍ଥାନରେ ଚଢ଼ାଉ କରି ୩ ଜଣଙ୍କୁ ଗିରଫ ମଧ୍ୟ କରିଛନ୍ତି । ଏହାସହ ସେମାନଙ୍କଠାରୁ ୧୦୦ରୁ ଉର୍ଦ୍ଧ୍ବ ଲିଟର ଦେଶୀ ମଦ, ୬୩ଟି ବିଦେଶୀ ମଦ ଓ ମଦ ପାଇଁ ବ୍ୟବହାର ଡେକଚି ଓ ଡ୍ରମକୁ ଜବତ କରିଛି ଅବକାରୀ ବିଭାଗ ।

ମଦ ପାଇଁ ବ୍ୟବହାର କରାଯାଉଥିବା ୩ହଜାର ଲିଟର ମହୁଲ ପୋଚକୁ ନଷ୍ଟ କରାଯାଇଥିବା କହିଛନ୍ତି ଜିଲ୍ଲା ଅଧିକ୍ଷକ । ଗିରଫ ହୋଇଥିବା ଅଭିଯୁକ୍ତମାନେ ହେଲେ କଙ୍କଡ଼ାହାଡ଼ ଥାନା ବନ୍ଦାଣିଆ ଗ୍ରାମର ରମଣୀ ହାଁସଦା, କଙ୍କଡ଼ାହାଡ଼ର ସାନୁ ଗୁପ୍ତା ଏବଂ କାମାକ୍ଷାନଗର ଥାନା କନ୍ଦରସିଂହା ଗ୍ରାମର ପ୍ରସନ୍ନ ବେହେରା । ତିନି ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ।

ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ