ଢେଙ୍କାନାଳ: ଦେହରେ ନାଲି ପାଟ, ପାଦରେ ରକ୍ତ ଅଳତା । ଆଉ କିଛି ମୁହୂର୍ତ୍ତ ପରେ ସିନ୍ଦୁର ପିନ୍ଧି ସାଜିଥାନ୍ତେ ବଧୂ । ବେକରେ ବରଣମାଳା ପକାଇ ସାତ ଜନ୍ମକୁ ସାଖୀ ରଖି ସ୍ବାମୀର ହାତ ଧରିଥାନ୍ତେ । ହେଲେ ବେକରେ ବରଣମାଳା ବଦଳରେ ଝୁଲିଲା ଫାଶୀ । ବିବାହ ଦିନରେ ହିଁ ଝୁଲନ୍ତା ଅବସ୍ଥାରେ ମିଳିଲା କନ୍ୟାର ମୃତଦେହ । ଢେଙ୍କାନାଳ ଜିଲ୍ଲା ମୋଟଙ୍ଗା ଥାନା ଅନ୍ତର୍ଗତ ପନେଇଲ କଲୋନୀ ସାହିରେ ଘଟିଛି ଏହି ଅଭାବନୀୟ ଘଟଣା । ମୃତକ ସେହି ଗ୍ରାମର ସସ୍ମିତା ନାଏକ ।
ସୂଚନାଯୋଗ୍ୟ, ସସ୍ମିତା ଅନୁଗୋଳ ବନ୍ତଳା ଥାନା ଅନ୍ତର୍ଗତ ପୁକୁଟୁଙ୍ଗା ଗ୍ରାମର ସିଲୁ ବେହେରାଙ୍କୁ ଭଲ ପାଉଥିଲେ । ଉଭୟ ମଧ୍ୟରେ ପ୍ରେମ ସମ୍ପର୍କ ଥିଲା । ସସ୍ମିତା ବିବାହ ପାଇଁ ଜିଦ୍ ଧରିଥିବାବେଳେ ଦିନ ଗଡାଇ ଚାଲିଥିଲେ ସିଲୁ । ବୁଝାସୁଝା ପରେ ସିଲୁ ସସ୍ମିତାଙ୍କ ଘରେ ଆସି ଏକ ମାସ ଧରି ରହିଥିଲେ । ସୋମବାର ଉଭୟଙ୍କ ବିବାହ ପାଇଁ ସମସ୍ତ ପ୍ରସ୍ତୁତି ସରିଥିଲା । ହେଲେ କିଛି ସମୟ ପରେ ବର ବା ସିଲୁଙ୍କ କୌଣସି ଖୋଜଖବର ମିଳିନଥିଲା । ପରିବାର ଲୋକେ ବରକୁ ଖୋଜୁଥିବାବେଳେ ଘରେ ପାଟ ଶାଢୀରେ ସଜେଇ ହୋଇଥିବା ସସ୍ମିତାଙ୍କ ମୃତଦେହ ଝୁଲାନ୍ତ ଅବସ୍ଥାରେ ଦେଖିବାକୁ ମିଳିଥିଲା । ଏପରିସ୍ଥଳରେ ସିଲୁ ହିଁ ସସ୍ମିତାଙ୍କୁ ମାରି ଟାଙ୍ଗି ଦେଇ ଚାଲି ଯାଇଥିବା ଅଭିଯୋଗ କରିଛନ୍ତି ମୃତକଙ୍କ ପରିବାର ଲୋକେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି ଏବଂ ଘଟଣାରେ ଛାନଭିନ୍ ଆରମ୍ଭ କରିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
