ଢେଙ୍କାନାଳ: ସଦର ବ୍ଲକ ଅନ୍ତର୍ଗତ ସାଂକୁଲେଇ ପଞ୍ଚାୟତର ସମିତି ସଭ୍ୟା ପ୍ରାର୍ଥୀଙ୍କ ସ୍ୱାମୀ ନିଖୋଜ ଅଭିଯୋଗ । ଗ୍ରାମ ନିକଟରୁ ସ୍କୁଟି ଉଦ୍ଧାର ହୋଇଥିଲେ ମଧ୍ୟ ତାଙ୍କୁ କେହି ଅପହରଣ କରିଥିବା ନେଇ ଥାନାରେ ଅଭିଯୋଗ କରିଛନ୍ତି ସମିତି ସଭ୍ୟା ପ୍ରାର୍ଥୀ । ଗତକାଲି(ବୁଧବାର) ପ୍ରଥମ ପର୍ଯ୍ୟାୟ ମତଦାନ ସରି ଥିବାବେଳେ ଆସନ୍ତାକାଲି(ଶୁକ୍ରବାର) ଦ୍ବିତୀୟ ପର୍ଯ୍ୟାୟ ମତଦାନ ହେବ ।
ସମିତି ସଭ୍ୟା ପ୍ରାର୍ଥୀଙ୍କ ସ୍ୱାମୀ ନିଖୋଜ, ଅପହରଣ ସନ୍ଦେହ ସୂଚନା ଅନୁଯାୟୀ, ସାଙ୍କୁଲେଇ ଗ୍ରାମ ପଞ୍ଚାୟତରୁ ସମିତି ସଭ୍ୟ ପ୍ରାର୍ଥିନୀ ଭାରତୀ ରଥଙ୍କ ସ୍ବାମୀ ଦୀପକ ଦାଶଙ୍କୁ ଅପହରଣ କରାଯାଇଛି । ଗତକାଲି ସନ୍ଧ୍ୟାରେ ଦୀପକ କେଉଁଆଡେ ସ୍କୁଟି ନେଇ ଯାଇଥିଲେ ମଧ୍ୟ ଆଉ ଫେରିନଥିଲେ । ଫଳରେ ତାଙ୍କ ପରିବାର ଲୋକେ ରାତିରେ ଖୋଜା ଖୋଜି କରି ଗ୍ରାମ ଠାରୁ କିଛି ଦୂରରୁ ସ୍କୁଟି ପଡିଥିବା ଦେଖିବାକୁ ପାଇଥିଲେ । ସ୍କୁଟିରେ ସାମାନ୍ୟ ରକ୍ତ ଛିଟା ଲାଗିଥିବାର ଦେଖି ତାଙ୍କୁ କେହି ଅପହରଣ କରିନେଇଥିବା ସନ୍ଦେହ କରିଛନ୍ତି ପରିବାର ଲୋକେ ।
ଆସନ୍ତାକାଲି ଦ୍ବିତୀୟ ପର୍ଯ୍ୟାୟ ଭୋଟ ଗ୍ରହଣ ଥିବାବେଳେ ଦୀପକଙ୍କ ନିଖୋଜକୁ ନେଇ ଭାରତୀ ସଦର ଥାନାରେ ଅଭିଯୋଗ କରିଛନ୍ତି । ଅନ୍ୟପଟେ କାହା ସହ ଶତ୍ରୁତା ନଥିବା କହିଛନ୍ତି ଭାରତୀ । ଖବର ପାଇ ତଦନ୍ତ ଆରମ୍ଭ କରିଛି ପୋଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
