ଢେଙ୍କାନାଳ:10 ବର୍ଷ ପରେ ଖୋଲିଲା ମୃତ୍ୟୁର ରହସ୍ୟ । 2013 ମସିହାରୁ ନିଖୋଜ ଥିବା ବ୍ୟକ୍ତିଙ୍କ ମୃତଦେହ ମାଟିତଳୁ ମିଳିଲା । ଯୁବକଙ୍କ ଶରୀରର କିଛି ହାଡ଼ ମାଟିତଳୁ ମିଳିବା ପରେ ଟେଷ୍ଟିଂ ପାଇଁ ପୋଲିସ ଲାବକୁ ପଠାଇଛି । ଢେଙ୍କାନାଳ ଟାଉନ ଥାନା ଅନ୍ତର୍ଗତ ସୁନ୍ଦରୀଖାଲ ଅଞ୍ଚଳର ଦୋଳଗୋବିନ୍ଦ ବେହେରା ନାମକ ଯୁବକଙ୍କ ମୃତଦେହ ହାଡ଼ ବୋଲି ଜଣାପଡିଛି ।
2013ରୁ ଥିଲେ ନିଖୋଜ
ଗତ ୨୦୧୩ ମସିହା ଜୁଲାଇ ମାସରୁ ନିଖୋଜ ଥିଲେ ଦୋଳଗୋବିନ୍ଦ ବେହେରା । ପରିବାର ପକ୍ଷରୁ ପ୍ରଥମେ ଥାନାରେ ନିଖୋଜ ଅଭିଯୋଗ କରାଯାଇଥିଲା । ପରେ କୌଣସି ପତ୍ତା ନମିଳିବାରୁ ୧୫ ମାସ ପରେ ୨୦୧୪ ମସିହାରେ ପରିବାର ଲୋକେ ହତ୍ୟା ଅଭିଯୋଗ କରିଥିଲେ । ଆଉ ଏହାର ୧୦ ବର୍ଷ ପରେ ନିଖୋଜ ଦୋଳଗୋବିନ୍ଦ ବେହେରାଙ୍କ ହତ୍ୟାକାଣ୍ଡ ଘଟଣାର ପର୍ଦ୍ଦାଫାସ କରିଛି ଢେଙ୍କାନାଳ ଟାଉନ ପୋଲିସ । ଏ ସଂକ୍ରାନ୍ତରେ ୩ ଜଣଙ୍କୁ ଟାଉନ ଥାନା ପୋଲିସ ଗିରଫ କରିଛି । ଅଭିଯୁକ୍ତମାନେ ସୁନ୍ଦରୀ ଖାଲର ସନ୍ତୋଷ ପ୍ରଧାନ, ଦିଲୀପ ନାଏକ ଓ ମାଘ ତଳ ବାହାଳୀ ଗ୍ରାମର ବଟକୃଷ୍ଣ ଦେହୁରୀ ବୋଲି ଜଣାପଡିଛି ।