ଢେଙ୍କାନାଳ:ଜିଲ୍ଲା କାର୍ଯ୍ୟାଳୟ ପରିସରରେ ମଦ୍ୟପ କର୍ମଚାରୀଙ୍କ ଉନ୍ମତ୍ତ କାଣ୍ଡ । ଅନ୍ୟ ଜଣେ ସହକର୍ମଚାରୀଙ୍କୁ ଗାଳିଗୁଲଜ କରିବା ସହ ମାଡ ମାରି ମୁଣ୍ଡ ଫଟାଇଲେ ଅଭିଯୁକ୍ତ । ଗତକାଲି(ବୁଧବାର) ସନ୍ଧ୍ୟାରେ ଢେଙ୍କାନାଳ ଜିଲ୍ଲା କାର୍ଯ୍ୟାଳୟ ପରିସରରେ ଥିବା ଅନୁଗୁଳ ଦୁବୁରି ସୁକିନ୍ଦା ରେଳପଥର ସ୍ବତନ୍ତ୍ର ଭୂ ଅର୍ଜନ ଅଧିକାରୀଙ୍କ କାର୍ଯ୍ୟାଳୟରେ ଏହି ଅଭାବନୀୟ ଘଟଣା ଘଟିଛି । ଗୁରୁତର କର୍ମଚାରୀ ସେଠାରେ ଅମିନ ଭାବେ କାର୍ଯ୍ୟରତ ଅନ୍ତର୍ଯ୍ୟାମୀ ନାୟକ ବୋଲି ଜଣାପଡିଛି । ଆହତ ଅବସ୍ଥାରେ ତାଙ୍କୁ ଚିକିତ୍ସା ପାଇଁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ତେବେ ଆକ୍ରମଣକାରୀ ମଧ୍ୟ ଉକ୍ତ ଭୂ ଅର୍ଜନ ଅଧିକାରୀଙ୍କ କାର୍ଯ୍ୟାଳୟରେ ଅମିନ ଭାବେ କାର୍ଯ୍ୟ କରୁଛନ୍ତି । ତାଙ୍କ ନାମ ଲିପୁନ ସ୍ବାଇଁ ବୋଲି ସୂଚନା ମିଳିଛି । ଆକ୍ରମଣ ସମ୍ପର୍କରେ ଆହତ କର୍ମଚାରୀଙ୍କ ପକ୍ଷରୁ ଅଭିଯୋଗ ପରେ ଟାଉନ ଥାନା ପୋଲିସ ପହଞ୍ଚି ଅଭିଯୁକ୍ତ କର୍ମଚାରୀଙ୍କୁ ଥାନାରେ ଅଟକ ରଖିଛି । ଯାହା ସୂଚନା ମିଳିଛି, ବୁଧବାର ସନ୍ଧ୍ୟା ପ୍ରାୟ ୬ଟା ସମୟରେ ଅନ୍ତର୍ଯ୍ୟାମୀ ଅଫିସରେ ବସି କାମ କରୁଥିଲେ । ଏହି ସମୟରେ ଲିପୁନ ସ୍ବାଇଁ ମଦ୍ୟପାନ କରି ଆସି ତାଙ୍କୁ ଗାଳିଗୁଳଜ କରିଥିଲେ ।