ଢେଙ୍କାନାଳ: ବ୍ୟାଙ୍କରେ ଗ୍ରାହକଙ୍କ ବିଶ୍ବାସରେ ବିଷ ଦେଇ ଲକ୍ଷାଧିକ ଟଙ୍କା ହଡପ । ଏପରିକି ଗ୍ରାହକଙ୍କ କ୍ରେଡିଟ କାର୍ଡ଼ରେ ଫ୍ରଡ଼ କରିଛନ୍ତି ଖୋଦ ବ୍ୟାଙ୍କ କର୍ମଚାରୀ । ଏହି ଘଟଣାରେ ଏଚଡିଏଫସି ବ୍ୟାଙ୍କର ଜଣେ ଆସିଷ୍ଟାଣ୍ଟ ମ୍ୟାନେଜରଙ୍କୁ ଢେଙ୍କାନାଳ ଟାଉନ ପୋଲିସ ବାନ୍ଧି କୋର୍ଟ ଚାଲାଣ କରିଛି । ଗିରଫ ବ୍ୟାଙ୍କ କର୍ମଚାରୀ ଜଣଙ୍କ ଢେଙ୍କାନାଳ ସହର ସ୍ଥିତ ଏଚଡିଏଫସି ବ୍ୟାଙ୍କର ଆସିଷ୍ଟାଣ୍ଟ ମ୍ୟାନେଜର ମନୋଜ ପଟ୍ଟନାୟକ ବୋଲି ଜଣାପଡ଼ିଛି ।
ଗ୍ରାହକଙ୍କ କ୍ରେଡିତ କାର୍ଡରେ ଲକ୍ଷାଧିକ ଟଙ୍କା ଠକେଇ
ସୂଚନା ମୁତାବକ, ତପନ ବାରିକ ନାମକ ଜଣେ ରେଳ କର୍ମଚାରୀ ତାଙ୍କ କ୍ରେଡିଟ କାର୍ଡ଼କୁ ବ୍ୟାଙ୍କରେ ଦାଖଲ କରିସାରିଥିଲେ । ମାତ୍ର ବ୍ୟାଙ୍କର କ୍ରେଡିଟ କାର୍ଡ ସେକ୍ସନ ଦାୟିତ୍ବରେ ଥିବା କାରଣରୁ ଏହି ବ୍ୟାଙ୍କ ସହକାରୀ ପରିଚାଳକ ଜଣଙ୍କ ଚଞ୍ଚକତାର ସହ ପୁନର୍ବାର ନିଜ ମୋବାଇଲ ନମ୍ବର ପକାଇ ଚାଲୁ କରାଇ ଗ୍ରାହକଙ୍କ ନାମରେ ଟଙ୍କା ଉଠାଇ ଚାଲିଥିଲେ ।