ଦେବଗଡ଼: ରାତିସାରା ତାଣ୍ଡବ ରଚିଲେ ହାତୀପଲ । ଖାଇଲେ ଧାନଫସଲ, ଭାଙ୍ଗିଲେ ଘରଦ୍ୱାର ଓ ମାରିଲେ ଗାଈଗୋରୁ ଓ ଛେଳି । ବେସାହାରା ହୋଇଗଲେ ଗାଁର 4ଟି ପରିବାର । ଏଭଳି ଘଟଣା ଘଟିଛି ଦେବଗଡ଼ ଜିଲ୍ଲା ତିଳେଇବଣି ବ୍ଲକ କଲଣ୍ଡା ପଞ୍ଚାୟତ ଅନ୍ତର୍ଗତ ଚଡକମରା ଗ୍ରାମରେ ।
ଦେବଗଡ଼ ଜିଲ୍ଲାରେ ଦିନକୁ ଦିନ ହାତୀ ଉପଦ୍ରବ ଅସହ୍ୟ ହେବାରେ ଲାଗିଛି । ହାତୀପଲ ଜିଲ୍ଲାର ବିଭିନ୍ନ ଗ୍ରାମାଞ୍ଚଳରେ ନାହିଁ ନଥିବା କ୍ଷୟକ୍ଷତି ଘଟାଇ ଚାଲିଥିବା ବେଳେ ଦିନକୁ ଦିନ ସେମାନଙ୍କ ସ୍ଵଭାବ ହିଂସ୍ର ହେବାରେ ଲାଗିଛି । ହାତୀପଲଙ୍କ ଏମିତି ଏକ ତାଣ୍ଡବ ଗତ ରାତିରେ ଦେଖିବାକୁ ମିଳିଛି ଦେବଗଡ଼ ଜିଲ୍ଲା ତିଳେଇବଣି ବ୍ଲକ କଲଣ୍ଡା ପଞ୍ଚାୟତ ଅନ୍ତର୍ଗତ ଛଡ଼ାକମରା ଗ୍ରାମରେ । ସୂଚନା ଅନୁଯାୟୀ, ଗତ ରାତି ପ୍ରାୟ 9ଟା ସମୟରେ ହଦମୁଣ୍ଡା ସଂରକ୍ଷିତ ଜଙ୍ଗଲରୁ ପ୍ରାୟ 25ଟି ହାତୀପଲ ଛଡ଼କମରା ଗାଁକୁ ଆସିଥିଲେ । ହାତୀପଲଙ୍କ ରଡି ଶୁଣି ଗାଁ ଲୋକେ ଭୟରେ ଘରଦ୍ୱାର ଛାଡି ପିଲାଛୁଆଙ୍କୁ ନେଇ ଦୂରକୁ ଚାଲି ଯାଇଥିଲେ । ସକାଳୁ ଘରକୁ ଫେରିବା ପରେ ଗାଁରେ ହାତୀପଲଙ୍କ ତାଣ୍ଡବଲୀଳା ଦେଖିବାକୁ ପାଇଥିଲେ ଗ୍ରାମବାସୀ । ହାତୀପଲ ଗାଁର 4ଟି ଘର ଭାଙ୍ଗି ସମ୍ପୂର୍ଣ୍ଣ ଧୂଳିସାତ କରିଦେଇଥିବା ବେଳେ ଖଳାରେ ଗଦା ହୋଇଥିବା ଧାନ ଓ ଘରେ ଥିବା ଖାଦ୍ୟପଦାର୍ଥ ଖାଇବା ସହ ନଷ୍ଟ କରି ଚାଲି ଯାଇଥିଲେ ।
କେବଳ ସେତିକି ନୁହଁ, ହାତୀପଲଙ୍କ ଆକ୍ରମଣରୁ ବର୍ତ୍ତି ପାରିନଥିଲେ ଗୃହପାଳିତ ପଶୁ । ଗାଁର ଦୁଇଟି ପରିବାରର ତିନୋଟି ବଳଦ ଓ ଚାରିଗୋଟି ଛେଳିକୁ ହାତୀ କଚାଡି ମାରି ଦେଇଥିବା ଦୃଶ୍ୟ ସମସ୍ତଙ୍କୁ ଆତଙ୍କିତ କରିଛି । ଗୁହାଳ ଘର ଭାଙ୍ଗି ବଳଦ ଓ ଛେଳିଙ୍କୁ ତଳେ କଚାଡି ମାରି ଦେଇଛନ୍ତି ହିଂସ୍ର ହାତୀପଲ । ହାତୀପଲ ମଧ୍ୟରେ ଥିବା ଗୋଟିଏ ଦନ୍ତାହାତୀ ଅଧିକ ହିଂସ୍ର ହୋଇ ଘରଦ୍ୱାର ଭାଙ୍ଗିବା ସହ ଗୃହପାଳିତ ପଶୁଙ୍କୁ ମାରି ଦେଇଥିବା ଲୋକେ ଅଭିଯୋଗ କରିଛନ୍ତି । ହାତୀପଲଙ୍କ ଏହି ତାଣ୍ଡବଲୀଳା ସମୟରେ ଗ୍ରାମବାସୀ ଦେବଗଡ଼ ବନବିଭାଗକୁ ଖବର ଦେଇଥିଲେ । ବନ କର୍ମଚାରୀମାନେ ତୁରନ୍ତ ଗାଁକୁ ପହଞ୍ଚି ହାତୀପଲଙ୍କୁ ଘଉଡାଇବା ପାଇଁ ଉଦ୍ୟମ କରିଥିଲେ ମଧ୍ୟ ଶେଷରେ ବିଫଳ ହୋଇଥିଲେ ।