ଦେବଗଡ ବିଜେଡିରେ ବିଦ୍ରୋହ, ଜିଲ୍ଲା ସଭାପତିଙ୍କ ଇସ୍ତଫା

ଟିକେଟ୍‌ ବଣ୍ଟାକୁ ନେଇ ଦେଖାଦେଇଛି ଅସନ୍ତୋଷ । ଏଥିରେ ସାମିଲ ହୋଇଛି ଦେବଗଡ ବିଜେଡି । ଯୁବ ନେତାଙ୍କୁ ବିରୋଧ କରିଛନ୍ତି ଜିଲ୍ଲା ସଭାପତି ।

ଭୁବନେଶ୍ବର: ବିଜେଡିର ଦେବଗଡ ପ୍ରାର୍ଥୀତ୍ବକୁ ନେଇ ଦେଖାଦେଇଛି ବିଦ୍ରୋହ । ଗତକାଲି ମୁଖ୍ୟମନ୍ତ୍ରୀ ଦେବଗଡରୁ ଜଣେ ଯୁବ ପ୍ରାର୍ଥୀ ଭାବେ ରୋମାଞ୍ଚ ରଞ୍ଜନ ବିଶ୍ବାଳଙ୍କୁ ପ୍ରାର୍ଥୀ କରିଛନ୍ତି । ଯାହାକୁ ନେଇ ଦେବଗଡରେ ଦେଖାଦେଇଛି ବିଦ୍ରୋହ ।

ଆଜି ନବୀନ ନିବାସରୁ ଦଳୀୟ ଟିକେଟ ନେଇ ଆସିବା ପରେ ତାଙ୍କୁ ବିରୋଧ କରିଛନ୍ତି ଜିଲ୍ଲା ସଭାପତି । ରୋମାଞ୍ଚଙ୍କ ପ୍ରାର୍ଥୀତ୍ବକୁ ବିରୋଧ କରି ଜିଲ୍ଲା ସଭାପତି ସୁଧିର କପରଦାର ବିଜେଡିରୁ ଇସ୍ତଫା ଦେଇଛନ୍ତି । ସୁଧିର ମଧ୍ୟ ଆଜି ନବୀନ ନିବାସରେ ପହଞ୍ଚି ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ।

ସେ କହିଛନ୍ତି ଯେ ମୁଖ୍ୟମନ୍ତ୍ରୀ ଯାହାଙ୍କୁ ପ୍ରାର୍ଥୀ କରିଛନ୍ତି ସେ ଜଣେ ମାଫିଆ । ହେଲେ ଗତ 12 ବର୍ଷ ହେଲା ତାଙ୍କୁ ଦେବଗଡରେ ସଂଗଠନ କରିବାକୁ କୁହାଯାଇଛି । ଦଳର ଜଣେ ଶୃଙ୍ଖଳିତ ସଦସ୍ୟ ଭାବେ ବିଜେଡିର ସଂଗଠନକୁ ସଦୃଢ କରିବାକୁ ସେ ଗୋତି ଶ୍ରମିକ ଭଳି କାର୍ଯ୍ୟ କରିଛନ୍ତି । ତାଙ୍କୁ ପୂର୍ବରୁ ପ୍ରାର୍ଥୀ କରାଯିବା ନେଇ ଆଶା ଦେଖାଦେଇଥିଲା । ହେଲେ ଦଳରେ ତାଙ୍କୁ ଅପମାନିତ ଓ ଅଣଦେଖା କରାଯାଇଛି ବୋଲି ସୁଧିର କହିଛନ୍ତି ।

ତାଙ୍କୁ ପ୍ରାର୍ଥୀ କରାନଯିବା ପଛରେ ସମ୍ବଲପୁର ଲୋକସଭା ପ୍ରାର୍ଥୀ ନଳିନୀ ପ୍ରଧାନ ଚକ୍ରାନ୍ତ କରିଛନ୍ତି ବୋଲି ସେ ଅଭିଯୋଗ କରିଛନ୍ତି । ବିଜେଡି ମୁଖିଆଙ୍କ ନିୟନ୍ତ୍ରଣରେ ଆଉ ଦଳ ନାହିଁ । ଦଳ ଅନ୍ୟ କିଛି ନେତାଙ୍କ ହାତରେ ନିୟନ୍ତ୍ରିତ ହେଉଛି । ମୁଖିଆଙ୍କୁ ସମ୍ପୂର୍ଣ୍ଣ ଅନ୍ଧକାରରେ ରଖି ଚିଠା ପ୍ରସ୍ତୁତ କରାଯାଉଛି । ସୁପ୍ରିମୋ କେବଳ ଚିଠାରେ ଥିବା ନାମ ପଢୁଛନ୍ତି ବୋଲି ସୁଧିର ଅଭିଯୋଗ କରିଛନ୍ତି ।

ସେପଟେ ରୋମାଞ୍ଚ ରଞ୍ଜନ କିନ୍ତୁ ସୁଧିରଙ୍କ ବିରୋଧରେ ପଦୁଟିଏ ମଧ୍ୟ କହିନାହାନ୍ତି । ବରଂ ସୁଧିରଙ୍କୁ ସେ ନିଜ ବାପା ବୋଲି ସମ୍ବୋଧନ କରିଛନ୍ତି । ସେ ତତ୍କାଳୀନ ଜନତା ଦଳ ଅମଳରୁ ଦଳ ସହ ସମ୍ପୃକ୍ତ ଅଛନ୍ତି । ତାଙ୍କ ମନରେ ଥିବା ଅସନ୍ତୋଷ ଏବଂ କ୍ଷୋଭ ସମ୍ପର୍କରେ ଆଲୋଚନା କରାଯିବ ବୋଲି କହିଛନ୍ତି ରୋମାଞ୍ଚ ।

ଭୁବନେଶ୍ବରୁ ଅଜିତ ଦାସ, ଇଟିଭି ଭାରତ