ଦେବଗଡ଼: ଜିଲ୍ଲାରେ କାର୍ଯ୍ୟକ୍ଷମ ହୋଇପାରୁନି ପ୍ରସାର ଭାରତୀ ପ୍ରସାରଣ । ଆଜକୁ ଦୀର୍ଘବର୍ଷ ହେଲା ଅଚଳ ହୋଇ ପଡିଛି ଦେବଗଡ଼ ସହରରେ ଥିବା ପ୍ରସାର ଭାରତୀ କେନ୍ଦ୍ର । ଫଳରେ ଜିଲ୍ଲାବାସୀ ରେଡ଼ିଓ ସେବା ପାଇବାରୁ ବଞ୍ଚିତ ହୋଇଛନ୍ତି ।
ଦୈବୀ ଦୁର୍ବିପାକ ହେଉ କିମ୍ବା ପ୍ରାକୃତିକ ବିପର୍ଯ୍ୟୟ, ଯେକୌଣସି ଜରୁରୀକାଳୀନ ପରିସ୍ଥିତିରେ ଯେଉଁଠି ଟେଲିଭିଜନ ଓ ଇଣ୍ଟରନେଟ ସେବା ଅଚଳ ହୋଇଯାଏ ସେଠାରେ ରେଡ଼ିଓ ଏକ ପ୍ରକୃଷ୍ଠ ମାଧ୍ୟମର ଭୂମିକା ଗ୍ରହଣ କରିଥାଏ । ବିଶେଷକରି ଯେଉଁ ଅଞ୍ଚଳରେ ଟେଲିଭିଜନ ଓ ଇଣ୍ଟରନେଟ ସେବା ଉପଲବ୍ଧ ନଥାଏ ସେଠାରେ ଲୋକେ ରେଡ଼ିଓ କୁ ସୂଚନା ଓ ମନୋରଂଜନ ପାଇଁ ବହୁଳ ଭାବରେ ବ୍ୟବହାର କରିଥାଆନ୍ତି ।
ଏଦୃଷ୍ଟିରୁ ଦେବଗଡ଼ ଜିଲ୍ଲାବାସୀଙ୍କୁ ରେଡ଼ିଓ ସେବା ଯୋଗାଇଦେବା ଲକ୍ଷ୍ୟରେ ଜିଲ୍ଲା ସଦର ମହକୁମାରେ ଆଜକୁ ଦୀର୍ଘ 20 ବର୍ଷ ପୂର୍ବରୁ ସରକାର ସ୍ଥାପିତ କରିଛନ୍ତି ଏକ ପ୍ରସାର ଭାରତୀ ପ୍ରସାରଣ କେନ୍ଦ୍ର । ମାତ୍ର ବିଡ଼ମ୍ବନାର ବିଷୟ ଯେ , ଏହି ପ୍ରସାରଣ କେନ୍ଦ୍ରଟି ପୂର୍ଣ୍ଣମାତ୍ରାରେ କାର୍ଯ୍ୟକ୍ଷମ ହୋଇପାରିନାହିଁ । ଏହି କେନ୍ଦ୍ରରେ ଆବଶ୍ୟକ ଅନୁଯାୟୀ ଉଚ୍ଚ କ୍ଷମତା ସମ୍ପନ୍ନ ଟ୍ରାନ୍ସମିସନ ଲାଗିନଥିବାରୁ ଏହା ମାତ୍ର 5 ଏୟାର କିଲୋମିଟର ପରିଧି ମଧ୍ୟରେ ପ୍ରସାରଣ କରିବାକୁ ସମର୍ଥ ହେଉଛି ।