ଦେବଗଡ: ଗ୍ରୀଷ୍ମଋତୁ ଆରମ୍ଭରୁ ଗାଁରେ ଦେଖା ଦେଲାଣି ଜଳକଷ୍ଟ । ପାନୀୟଜଳ ମୁନ୍ଦାଏ ପାଇଁ ଲୋକେ ହେଉଛନ୍ତି ଡହଳ ବିକଳ । ସେପଟେ ବସୁଧା ଯୋଜନାରେ ନିର୍ମିତ ପାଇପ ଜଳ ଯୋଗାଣ ପ୍ରକଳ୍ପ ଦୁଇ ମାସ ହେଲା ଅଚଳ ହୋଇ ପଡି ରହିଛି । ଏହି ସମସ୍ୟା ଦେଖିବାକୁ ମିଳିଛି ଦେବଗଡ଼ ଜିଲ୍ଲା ତିଳେଇବଣି ବ୍ଲକର କଲଣ୍ଡା ଗାଁରେ ।
ଖରାଦିନ ଆରମ୍ଭରୁ ଜଳକଷ୍ଟରେ ବେହାଲ କଲଣ୍ଡା ଗ୍ରାମବାସୀ ଲୋକଙ୍କୁ ବିଶୁଦ୍ଧ ପାନୀୟଜଳ ଯୋଗାଇ ଦେବା ଲକ୍ଷ୍ୟରେ ସରକାର କଲଣ୍ଡା ଗାଁରେ କାର୍ଯ୍ୟକାରୀ କରିଛନ୍ତି ବସୁଧା ଯୋଜନା । ଏହି ଯୋଜନା ଅନ୍ତର୍ଗତ ଗାଁରେ ନିର୍ମାଣ ହୋଇଛି ପାନୀୟ ଜଳ ପ୍ରକଳ୍ପ । ମାତ୍ର ଆଜିକୁ ଦୀର୍ଘ ଦୁଇ ମାସ ହେଲା ଅଚଳ ହୋଇ ପଡିରହିଛି ଏହି ପ୍ରକଳ୍ପ । ଫଳରେ ପାନୀୟ ଜଳ ମୁନ୍ଦାଏ ପାଇଁ ନାହିଁ ନଥିବା ସମସ୍ୟା ଭୋଗୁଛନ୍ତି କଲଣ୍ଡା ଗ୍ରାମବାସୀ ।
ସେପଟେ ଗାଁରେ ଥିବା 5ଟି ନଳକୂପ ମଧ୍ୟରୁ 4ଟି ନଳକୂପରୁ ପିଇବା ଉପଯୋଗୀ ପାଣି ବାହାରୁ ନାହିଁ । କେବଳ ଗୋଟିଏ ମାତ୍ର ନଳକୂପ ଉପରେ ନିର୍ଭର କରି ଆସୁଛନ୍ତି ଗାଁର 80ଟି ପରିବାର । ପାଣି ମୁନ୍ଦାଏ ପାଇଁ ଲୋକଙ୍କୁ ନଳକୂପରେ ଲମ୍ବା ଲାଇନରେ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଛି । ଗୋଟିଏ ମାତ୍ର ନଳକୂପ ଲୋକଙ୍କ ପାନୀୟଜଳ ଆବଶ୍ୟକତାକୁ ମେଣ୍ଟାଇ ପାରୁନାହିଁ ।
ଗାଁରେ ଦୁଇ ମାସ ହେଲା ଅଚଳ ହୋଇ ପଡ଼ିଥିବା ବସୁଧା ପାନୀୟଜଳ ପ୍ରକଳ୍ପକୁ ତୁରନ୍ତ କାର୍ଯ୍ୟକ୍ଷମ କରିବା ଓ ଅଚଳ ନଳକୂପଗୁଡିକୁ ମରାମତି କରିବା ପାଇଁ ଗ୍ରାମବାସୀ ସ୍ଥାନୀୟ ପଞ୍ଚାୟତ କର୍ତ୍ତୃପକ୍ଷଙ୍କୁ ଜଣାଇ ଆସୁଥିଲେ ହେଁ, ସମସ୍ୟାର ସମାଧାନ ହୋଇପାରୁନାହିଁ । ଜିଲ୍ଲାରେ ଅନୁଭୂତ ହେଉଥିବା ପ୍ରବଳ ଗ୍ରୀଷ୍ମ ପ୍ରବାହକୁ ନଜରରେ ରଖି ସ୍ଥାନୀୟ ପ୍ରଶାସନ ଏ ଦିଗରେ ବିହିତ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି ।
ଦେବଗଡରୁ ସରୋଜ ଶତପଥି, ଇଟିଭି ଭାରତ
