ଦେବଗଡ଼: ବିଦ୍ୟୁତ୍ ତାର ସଂସ୍ପର୍ଶରେ ଆସି ମାଈ ହାତୀର ମୃତ୍ୟୁ । ଦେବଗଡ଼ ଜିଲ୍ଲା ରିଆମାଳ ରେଞ୍ଜ ଅଧୀନ ଖୀଲବେରଣୀ ଗ୍ରାମ ନିକଟସ୍ଥ ଜଙ୍ଗଲରେ ଆଜି ଏକ ମାଈ ହାତୀର ମୃତଦେହ ପଡ଼ିଥିବା ଦେଖିବାକୁ ମିଳିଛି । ଖବରପାଇ ବନବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମାଈ ହାତୀର ମୃତଦେହକୁ ଉଦ୍ଧାର କରିଛନ୍ତି । ତେବେ ହାତୀର ମୃତଦେହ ଉଦ୍ଧାର କରିବା ପାଇଁ ବନବିଭାଗକୁ ନାକେଦମ ହେବାକୁ ପଡ଼ିଥିଲା । କାରଣ ମୃତହାତୀକୁ ଜଗିଥିଲେ ହାତୀପଲ ।
ତେବେ ଗତକାଲି(ବୁଧବାର) ବିଳମ୍ବିତ ରାତିରେ ଖିଲବେରେଣୀ ଗ୍ରାମ ଜଙ୍ଗଲକୁ କିଛି ହାତୀପଲ ପଶି ଆସିଥିଲେ । ତେବେ ଏମାନଙ୍କ ମଧ୍ୟରୁ ଏକ ମାଈ ହାତୀଟି ଜଙ୍ଗଲ ଭିତରେ ବୁଲୁଥିବା ବେଳେ ହଠାତ ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲା । ଫଳରେ ହାତୀଟିର ଘଟଣାସ୍ଥଳରେ ମୃତ୍ୟୁ ହୋଇଥିଲା ।
ସୂଚନାନୁସାରେ ଗତ କିଛିଦିନ ହେଲା ଏହି ଅଞ୍ଚଳରେ ୧୭ଟିକିଆ ହାତୀପଲ ଘୁରି ବୁଲୁଛନ୍ତି । ଯାହାକୁ ନେଇ ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ରହିଛନ୍ତି । ତେବେ ବୁଧବାର ଏହି ହାତୀପଲ ଭିତରୁ ଏକ ମାଈ ହାତୀର ମୃତ୍ୟୁ ଘଟିବା ପରେ ଅନ୍ୟ ୧୬ଟି ହାତୀ ପାଖରେ ଥିବା 5ଟି କମଳା ବଗିଚା ସମ୍ପୂର୍ଣ୍ଣ ଉଜାଡି ଦେବା ସହ ମଲା ହାତୀକୁ ଦୀର୍ଘ ସମୟ ଧରି ଜଗି ରହିଥିଲେ । ଏପରିକି ତାଙ୍କ ଆଖପାଖରେ କେହି ଲୋକଙ୍କୁ ଦେଖିବା ମାତ୍ରେ ଆକ୍ରମଣ କରିବାକୁ ଗୋଡାଉଥିଲେ ।