ଦେବଗଡ଼: ବିଗତ କିଛିମାସ ହେଲା ଦେବଗଡ଼ ଜିଲ୍ଲାର ବିଭିନ୍ନ ପ୍ରାନ୍ତରେ ବୃଦ୍ଧି ପାଇବାରେ ଲାଗିଛି ହାତୀ ଉପଦ୍ରବ। ଶହ ଶହ ସଂଖ୍ୟାରେ ହାତୀପଲ ଆସି ବ୍ୟାପକ ଧାନ ଫସଲ ନଷ୍ଟ କରିବା ସହିତ ଲୋକଙ୍କ ବାଡିବଗିଚା ନଷ୍ଟ କରି ପକାଉଛନ୍ତି । ଏପଟେ ଚାରିଦିନ ହେଲା ଏକ 30 ଘରିଆ ହାତୀପଲ ବାରକୋଟ ରେଞ୍ଜ ଅଧିନ ବୃନ୍ଦାବନପୁର, ଭଟାଚୁଆ ଓ ଧାଡ଼ିଖୋଲ ଆଦି ଗାଁକୁ ଆସି ନାହିଁ ନଥିବା କ୍ଷୟକ୍ଷତି ଘଟାଇ ଚାଲିଛନ୍ତି । ଏହି ଅଞ୍ଚଳରେ ହାତୀପଲ ପ୍ରାୟ 100 ଏକରରୁ ଊର୍ଦ୍ଧ୍ବ ଧାନ ଫସଲ ନଷ୍ଟ କରିଥିବା ବେଳେ, ବହୁ ସଂଖ୍ୟାରେ ବାଡିବଗିଚା ମଧ୍ୟ ନଷ୍ଟ କରି ଥିବା ଜଣାଯାଇଛି ।
ବର୍ତ୍ତମାନ ଧାନ ଫସଲ ଅମଳ ହେବାକୁ ବସିଥିବା ବେଳେ, ଏହି ସମୟରେ ହାତୀ ପଲ ଆସି 100 ଏକରରୁ ଉର୍ଦ୍ଧ୍ବ ଧାନ ଫସଲ ନଷ୍ଟ କରିସାରିଲେଣି, ଯାହା ଚାଷୀକୁଳଙ୍କ ପାଇଁ ଚିନ୍ତାର କାରଣ ହୋଇଛି । ସ୍ଥାନୀୟ ଗ୍ରାମବାସୀ ଓ ବନବିଭାଗ ରାତି ଉଜାଗର ରହି ହାତୀ ଘଉଡାଇବା ପାଇଁ ଯଥାସାଧ୍ୟ ଉଦ୍ୟମ ଜାରି ରଖିଥିଲେ ସୁଦ୍ଧା, ଏହାର କୌଣସି ସୁଫଳ ମିଳୁନାହିଁ । ଫଳରେ ଏନେଇ ଲୋକଙ୍କ ମଧ୍ୟରେ ଆତଙ୍କ ଖେଳି ଯାଇଛି ।