କଲଣ୍ଡା ନାଳରୁ ବୃଦ୍ଧଙ୍କ ମୃତଦେହ ଉଦ୍ଧାର

ସ୍ଥାନୀୟ ଦେବଗଡ଼ ଥାନା ଅନ୍ତର୍ଗତ କଲଣ୍ଡା ଗାଁ ନିକଟସ୍ଥ ନାଳରୁ ଜଣେ ବୃଦ୍ଧଙ୍କ ମୃତଦେହ ଉଦ୍ଧାର କରାଯାଇଛି । ଶୁକ୍ରବାର ସନ୍ଧ୍ୟାରେ ଏହି ଘଟଣା ଘଟିଥିବା ବେଳେ ମୃତକ ଜଣଙ୍କ ହେଉଛନ୍ତି ନୂଆଗାଁର ଅରକ୍ଷିତ ରଞ୍ଜିତ ।

ଦେବଗଡ: ସ୍ଥାନୀୟ ଦେବଗଡ଼ ଥାନା ଅନ୍ତର୍ଗତ କଲଣ୍ଡା ଗାଁ ନିକଟସ୍ଥ ନାଳରୁ ଜଣେ ବୃଦ୍ଧଙ୍କ ମୃତଦେହ ଉଦ୍ଧାର କରାଯାଇଛି । ଶୁକ୍ରବାର ସନ୍ଧ୍ୟାରେ ଏହି ଘଟଣା ଘଟିଥିବା ବେଳେ ମୃତକ ଜଣଙ୍କ ହେଉଛନ୍ତି ନୂଆଗାଁର ଅରକ୍ଷିତ ରଞ୍ଜିତ । ତାଙ୍କ ବୟସ ପାଖାପାଖି 65 ହେବ ବୋଲି ଅନୁମାନ କରାଯାଉଛି । ବୃଦ୍ଧ ଜଣକ ଶୁକ୍ରବାର ଅପରାହ୍ନରେ ଗାଁ ନିକଟ ନାଳକୁ ଗାଧୋଇବାକୁ ଯାଇ ଆଉ ଘରକୁ ଫେରି ନଥିଲେ ।

ସନ୍ଧ୍ୟାରେ ଗାଁର କିଛି ଯୁବକ ନାଳକୁ ଯାଇଥିବା ବେଳେ ସେଠାରେ ବୃଦ୍ଧଙ୍କ ମୃତଦେହ ପଡି ରହିଥିବା ଦେଖିବାକୁ ପାଇଥିଲେ । ମୃତଦେହକୁ ଗ୍ରାମବାସୀ ଉଦ୍ଧାର କରି ଦେବଗଡ଼ ପୋଲିସକୁ ଜଣାଇଥିଲେ । ଦେବଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ଘଟଣାର ତଦନ୍ତ ଆରମ୍ଭ କରିଛି । ତେବେ ଗାଧୋଉଥିବା ବେଳେ ନାଳରେ ବୁଡି ବୃଦ୍ଧଙ୍କ ମୃତ୍ୟୁ ହୋଇଥିବା ଗ୍ରାମବାସୀ ସନ୍ଦେହ କରିଛନ୍ତି ।

ଦେବଗଡରୁ ସରୋଜ କୁମାର ଶତପଥି, ଇଟିଭି ଭାରତ