ଦେବଗଡ: ଚାଷ ଜମିକୁ ଜଳ ଯୋଗାଇ କୃଷିର ବିକାଶ କରିବା ଲକ୍ଷ୍ୟରେ ସରକାର ବିଜୁ କୃଷକ ବିକାଶ ଯୋଜନା ମାଧ୍ୟମରେ ନିର୍ମାଣ କରାଯାଇଛି ଉଠା ଜଳସେଚନ ପ୍ରକଳ୍ପ । ମାତ୍ର ଅତ୍ୟନ୍ତ ନିମ୍ନ ମାନର ଓ ତ୍ରୁଟିପୂର୍ଣ୍ଣ ନିର୍ମାଣ କାର୍ଯ୍ୟ ଯୋଗୁଁ ଏହି ପ୍ରକଳ୍ପ ର ସୁଫଳ ଚାଷୀକୁଳ ପାଇ ପାରିଲେ ନାହିଁ । ଏଭଳି ସ୍ଥିତି ଦେଖିବାକୁ ମିଳିଛି ଦେବଗଡ଼ ଜିଲ୍ଲାର ହରିଡାବାହାଳ ଗାଁରେ ।
ନିମ୍ନମାନର ନିର୍ମାଣ କାମକରି ଠିକାଦାର ଛୁ, କାମରେ ଆସିଲାନି ବିଜୁ କୃଷକ ଉଠା ଜଳସେଚନ ପ୍ରକଳ୍ପ
ସରକାର ଲକ୍ଷାଧିକ ଟଙ୍କା ଖର୍ଚ୍ଚ କରି ଚାଷ ଜମିକୁ ଜଳ ଯୋଗାଇବା ସହ କୃଷିର ବିକାଶ କରିବା ଦିଗରେ ନିର୍ମାଣ ହୋଇଥିଲା ଉଠା ଜଳସେଚନ ପ୍ରକଳ୍ପ । ହେଲେ ନିମ୍ନମାନର କାମ ଯୋଗୁଁ ତାହା ଏବେ ଅଚଳାବସ୍ଥା ହୋଇ ପଡିରହିଛି । ଅଧିକ ପଢନ୍ତୁ...
ଦେବଗଡ଼ ଜିଲ୍ଲା ତିଳେଇବଣି ବ୍ଲକ ଝରାଗୋଗୁଆ ପଞ୍ଚାୟତର ହରିଡ଼ାବାହାଳ ଗ୍ରାମରେ ଚାଷଜମିକୁ ଜଳ ଯୋଗାଇ ଦେବା ଲକ୍ଷରେ ଚଳିତ ବର୍ଷ ସରକାର ନିର୍ମାଣ କରିଛନ୍ତି ଏକ ଉଠା ଜଳସେଚନ ପ୍ରକଳ୍ପ । ବିଜୁ କୃଷକ ବିକାଶ ଯୋଜନା ମାଧ୍ୟମରେ ନାବାର୍ଡ ସହାୟତା ରେ ନିର୍ମାଣ ହୋଇଛି ଏହି ପ୍ରକଳ୍ପ । ଏହି ପ୍ରକଳ୍ପରେ ମୋଟ 35 ଲକ୍ଷରୁ ଊର୍ଦ୍ଧ ଟଙ୍କା ବ୍ୟୟ ହୋଇଥିବାବେଳେ ଏଥିରେ 24 ହେକ୍ଟର ଚାଷଜମି ଉଭୟ ଖରିଫ ଓ ରବି ଋତୁରେ ଜଳସେଚିତ କରାଯିବାକୁ ଲକ୍ଷ ଧାର୍ଯ୍ୟ କରାଯାଇଛି । ଏଥି ସହିତ ଏହି ପ୍ରକଳ୍ପ ଦ୍ବାରା ମୋଟ 43 ଜଣ ଚାଷୀ ଉପକୃତ ହେବେ ବୋଲି ଲକ୍ଷ୍ୟ ରଖାଯାଇଛି ।
ମାତ୍ର ଅତ୍ୟନ୍ତ ପରିତାପର ବିଷୟ ଯେ, ଏହି ପ୍ରକଳ୍ପଟି ନିର୍ମାଣ ହେବା ପରଠାରୁ ଚାଷୀଙ୍କ କାର୍ଯ୍ୟରେ ଆସିପାରୁନାହିଁ । ତ୍ରୁଟିପୂର୍ଣ୍ଣ ଓ ଅତ୍ୟନ୍ତ ନିମ୍ନମାନର ନିର୍ମାଣ କାର୍ଯ୍ୟ ଯୋଗୁଁ ଏହି ପ୍ରକଳ୍ପଟି ନିର୍ଦ୍ଧାରିତ ଚାଷଜମିକୁ ଜଳ ଯୋଗାଇବାରେ ସକ୍ଷମ ହୋଇପାରୁ ନଥିବା ଚାଷୀକୂଳ ଅଭିଯୋଗ କରିଛନ୍ତି । ଗୋଟିଏ ପଟେ ଚଳିତ ବର୍ଷ ବର୍ଷାଭାଵରୁ ଚାଷକାର୍ଯ୍ୟ ପ୍ରଭାବିତ ହୋଇଥିବାବେଳେ ଅନ୍ୟପଟେ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ଉଠା ଜଳସେଚନ ପ୍ରକଳ୍ପଟି ଚାଷଜମିକୁ ଜଳ ଯୋଗାଇବାରେ ସକ୍ଷମ ନହେବାରୁ ଏସମଗ୍ର ଅଞ୍ଚଳରେ ଭୟଙ୍କର ମରୁଡି ପରିସ୍ଥିତି ଦେଖାଦେଇଛି ।
କୃଷି ପ୍ରଧାନ ଦେବଗଡ଼ ଜିଲ୍ଲାରେ କୃଷି ଓ କୃଷକର ବିକାଶ ପାଇଁ ସରକାର କୋଟି କୋଟି ଟଙ୍କା ବ୍ୟୟରେ ଗୋଟିଏ ପରେ ଗୋଟିଏ ଜଳସେଚନ ପ୍ରକଳ୍ପ ନିର୍ମାଣ କରିଚାଲିଛନ୍ତି ସତ ହେଲେ ବିଭାଗୀୟ କର୍ତ୍ତୃପକ୍ଷଙ୍କ ଦୁର୍ନୀତିଖୋର ମନୋଭାବ ଓ ଠିକାଦାର ପୋଷଣ ନୀତି ଯୋଗୁଁ ଏହି ପ୍ରକଳ୍ପର ସୁଫଳ ଚାଷୀକୁଳ ପାଇପାରୁ ନାହାନ୍ତି ।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ