ଦେବଗଡ: ସର୍ବମୋଟ 11 ଟି ୱାର୍ଡ ବିଶିଷ୍ଟ ଦେବଗଡ଼ ପୌର ପରିଷଦରେ ୱାର୍ଡ ମେମ୍ବର ଓ ପୌରାଧ୍ୟକ୍ଷ ପଦବୀ ପାଇଁ ପ୍ରାର୍ଥୀପତ୍ର ଦାଖଲ ଆଗାମୀ 7 ତାରିଖ ପର୍ଯ୍ୟନ୍ତ ଧାର୍ଯ୍ୟ ହୋଇଛି । ତେବେ ଅଦ୍ୟାବଧି ଜଣେ ହେଲେ ବି ପ୍ରାର୍ଥୀ ନିଜ ପ୍ରାର୍ଥୀପତ୍ର ଦାଖଲ କରିପାରି ନାହାନ୍ତି । ଏପର୍ଯ୍ୟନ୍ତ କେବଳ ସାତଜଣ ପ୍ରାର୍ଥୀ ସେମାନଙ୍କ ନାମାଙ୍କନ ପତ୍ର କ୍ରୟ କରିଥିବା ପୌର କାର୍ଯ୍ୟାଳୟ ସୂତ୍ରରୁ ଜଣାଯାଇଛି । ପୌରାଧ୍ୟକ୍ଷ ପଦବୀଟି ସାଧାରଣ ବର୍ଗ ମହିଳା ପ୍ରାର୍ଥୀଙ୍କ ପାଇଁ ସଂରକ୍ଷିତ ଅଛି ।
ବିଶେଷ କରି ପୌରାଧ୍ୟକ୍ଷ ପଦବୀ ପାଇଁ ପ୍ରମୁଖ ରାଜନୈତିକ ଦଳ ଯଥା ବିଜେଡି, ବିଜେପି ଓ କଂଗ୍ରେସ ଏପର୍ଯ୍ୟନ୍ତ ନିଜନିଜ ପ୍ରାର୍ଥୀ ଚୟନ କରିପାରି ନାହାନ୍ତି । ତେବେ ଏହାକୁ ନେଇ ବିଭିନ୍ନ ମହଲରେ ନାନା କଳ୍ପନା ଜଳ୍ପନା ପ୍ରକାଶ ପାଇଥିବା ବେଳେ, ଏହି ପ୍ରମୁଖ ତିନି ଦଳ ପକ୍ଷରୁ କିଏ ହେବେ ପୌରାଧ୍ୟକ୍ଷ ପ୍ରାର୍ଥୀ ? ସେଥିପ୍ରତି ରହିଛି ସମସ୍ତଙ୍କ ନଜର । ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଠାରୁ ଦେବଗଡ଼ ଜିଲ୍ଲାରେ ବିଜେଡିର ବିପୁଳ ବିଜୟ ପରେ ଦଳର ସାଂଗଠନିକ ସ୍ଥିତି ବେଶ ସଦୃଢ଼ ଥିବା ଜଣାପଡୁଛି ।