ଦେବଗଡ: ରାଜ୍ୟ ସରକାରଙ୍କ ଚାଷୀମାରଣ ନୀତି ତଥା ଧାନକ୍ରୟରେ ବ୍ୟାପକ ଅବ୍ୟବସ୍ଥା ପ୍ରତିବାଦରେ ଦେବଗଡରେ ବିଜେପିର ବିକ୍ଷୋଭ । ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବା ସହିତ ଗଣଧାରଣା ଦିଆଯାଇଛି ।
ରାଜ୍ୟ ସରକାରଙ୍କ ଚାଷୀ ମାରଣ ନୀତି ତଥା ବିଶେଷକରି ଚଳିତ ବର୍ଷ ଧାନ କିଣାରେ ଦେଖାଦେଇଥିବା ବ୍ୟାପକ ଅବ୍ୟବସ୍ଥା ପ୍ରତିବାଦରେ ବିଧାୟକ ସୁବାଷ ଚନ୍ଦ୍ର ପାଣିଗ୍ରାହୀ ଓ ଜିଲ୍ଲା ସଭାପତି ମୀନକେତନ ପ୍ରଧାନଙ୍କ ନେତୃତ୍ବରେ ଏହି ବିକ୍ଷୋଭ କରାଯାଇଛି । ଏହି ଅବସରରେ ରାଜ୍ୟପାଳଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଛି ।
ମଣ୍ଡିରେ ପଡି ରହିଥିବା ଧାନକୁ ମିଲ ମାଲିକଙ୍କ ଦ୍ବାରା ତୁରନ୍ତ ଉଠାଯିବା, ଚାଷୀଙ୍କ ଅଚଳ ହୋଇଥିବା ଟୋକନ ଗୁଡିକୁ ପୁନଃ କାର୍ଯ୍ୟକ୍ଷମ କରାଯିବା, ଧାନ ବିକ୍ରିରୁ ବଞ୍ଚିତ ଥିବା ଚାଷୀଙ୍କୁ ଧାନ ବିକ୍ରୟର ସୁଯୋଗ ଦିଆଯିବା, ଅସାଧୁ ମିଲ ମାଲିକ ଓ ଯୋଗାଣ ବିଭାଗର ସଲାସୁତରାରେ ଚାଲିଥିବା କ୍ବିଣ୍ଟାଲ ପ୍ରତି 5/6 କିଲୋ ଲେଖାଏଁ କଟନୀ ଛଟଣୀ ବ୍ୟବସ୍ଥାକୁ ଉଚ୍ଛେଦ କରାଯିବା, ଧାନ ବିକ୍ରୟ କରୁଥିବା ଚାଷୀଙ୍କୁ ବସ୍ତା ଓ ସୁତୁଳି ବାବଦକୁ ପ୍ରାପ୍ୟ ପ୍ରଦାନ କରାଯିବା ଓ ବିଭିନ୍ନ ମଣ୍ଡିରେ ଧାନ ରଖିବା ପାଇଁ ସେଡ ନିର୍ମାଣ କରାଯିବା ଦାବି କରି ଏହି ବିକ୍ଷୋଭ କରାଯାଇଛି । ଏହି ବିକ୍ଷୋଭରେ ବହୁ ସଂଖ୍ୟାରେ ବିଜେପି କର୍ମୀ ଓ ସମର୍ଥକଙ୍କ ସହିତ ଜିଲ୍ଲାର ବିଭିନ୍ନ ପ୍ରାନ୍ତରୁ ଆସିଥିବା ଶତାଧିକ ସଂଖାରେ ଚାଷୀ ସାମିଲ ହୋଇଥିଲେ ।
ଦେବଗଡରୁ ସରୋଜ ଶତପଥି, ଇଟିଭି ଭାରତ