କଟକ: ପ୍ରେମ ହେଉଛି ଶାସ୍ବତ ଓ ଚିରନ୍ତନ । ପ୍ରେମ ଦେଖେନି ବର୍ଣ୍ଣ ଜାତି ସମ୍ପ୍ରଦାୟ । କେବଳ ମନକୁ ମନ ଜିଣିଲେ ଆରମ୍ଭ ହୋଇଯାଏ ଏହି ଅତୁଟ ବନ୍ଧନ । ଯାହା କେବଳ ଅଢେଇ ଅକ୍ଷରରେ ବର୍ଣ୍ଣିତ । ତେବେ ଏହି ପ୍ରେମକୁ ନେଇ ଅନେକ ଇତିହାସ ମଧ୍ୟ ରହିଛି । ଏମିତିକି ଅନେକ ପ୍ରେମୀଯୁଗଳ ସମାଜ ପାଇଁ ବଡ଼ ଉଦାହରଣ ସାଜିଛନ୍ତି ।
ସେମିତି ଏକ ସ୍ବତନ୍ତ୍ର ପ୍ରେମକାହାଣୀ ହେଉଛି 62 ବର୍ଷୀୟ ଶେଖ ୟୁନୁସ ଓ 60 ବର୍ଷୀୟ ନିୟାମାତୁନ ନିଶା ବେଗମଙ୍କର । ଆଶ୍ଚର୍ଯ୍ୟ ଲାଗିପାରେ, ମାତ୍ର ପ୍ରକୃତ ସତ୍ୟ ତ ପ୍ରେମ କାହାଣୀର ଭିତର କଥା ।
ଉଭୟ ହେଉଛନ୍ତି ସଫଳ କ୍ରୀଡ଼ାବିତ । ୟୁନୁସ ଫୁଟବଲକୁ ନେଇ ଗୌରବ ହାସଲ କରିଥିଲା ବେଳେ ନିଶା ବେଗମ ଜଣେ ସଫଳ ଆଥଲେଟ । କିନ୍ତୁ ତାଙ୍କ ପ୍ରେମ କାହାଣୀ ଟିକେ ନିଆରା । ୟୁନୁସ ଜଣେ ମୁସଲିମ ପରିବାରର ପୁଅ ହୋଇଥିବାବେଳେ, ନିୟାମାତୁନ ନିଶା ବେଗମ ବିବାହ ପୂର୍ବରୁ ଥିଲେ ହିନ୍ଦୁ ଘରର ଝିଅ । ନାମ ଥିଲା ନମିତା ମିଶ୍ର । ଏକ ବ୍ରାହ୍ମଣ ପରିବାରର ଝିଅ ହେଉଛନ୍ତି ନମିତା । ପୂର୍ବରୁ କ୍ରୀଡା ଅଭ୍ୟାସ ସମୟରେ ଉଭୟଙ୍କ ମଧ୍ୟରେ ହୋଇଥିଲା ଭେଟଘାଟ । କିନ୍ତୁ ଉଭୟଙ୍କ ମନରେ ପ୍ରେମ ଭାବ ଜାଗ୍ରତ ହୋଇଥିଲେ ସୁଦ୍ଧା କହିବାକୁ ଡରୁଥିଲେ । ହେଲେ ତେବେ 1972ରୁ ଉଭୟଙ୍କ ମଧ୍ୟରେ ଗଢି ଉଠିଥିବା ପ୍ରେମ ସମ୍ପର୍କ, 8 ବର୍ଷ ପରେ 1980 ମସିହାରେ ଉଭୟ ବୈବାହିକ ଜୀବନରେ ବାନ୍ଧି ହୋଇଥିଲେ ।