କଟକ: ହଜାରେ ବର୍ଷର ପୁରୁଣା ଐତିହାସିକ ଗୁରୁତ୍ବ ବହନ କରୁଥିବା ପରମ୍ପରା ଓ ଭାଇଚାରାର ସହର କଟକ । ବାଉନ ବଜାର ତେପନ ଗଳିର ଏ ସହର କଟକ । ଏହି ଗଳିକନ୍ଦିର ରାସ୍ତାକୁ ସୁଲଭ ଉପାୟରେ ବାଟ କାଟିନିଏ 3 ଚକିଆ ଯାନ ରିକ୍ସା । କହିବାକୁ ଗଲେ ରିକ୍ସା ହେଉଛି କଟକବାସୀଙ୍କ ଏକ ଅଭିଚ୍ଛେଦ୍ୟ ଅଙ୍ଗ ।
ସିଲଭରସିଟିରେ ହଜୁଛି ରିକ୍ସାର ଚମକ, କ୍ଷୁବ୍ଧ କଟକିଆ
କିନ୍ତୁ ଏବେ ଏହି ଅଙ୍ଗ ହୋଇଯାଇଛି ଅକାମି । ପୂର୍ବଭଳି ରାସ୍ତାଘାଟରେ ରିକ୍ସା ଚାଳକଙ୍କୁ ମୁହଁରୁ ଆଉ ଶୁଭୁନି ବାଦାମବାଡି, ରାଣୀହାଟର ସ୍ବର । କାରଣ ସମୟ ବଦଳିଛି, ଆଉ ବଦଳିଯାଇଛି ଲୋକଙ୍କ ପସନ୍ଦ ଓ ମାନସିକତା । ବାଟୋଇଟିଏ ଏବେ ଆଉ ହାତ ଠାରି ଡାକୁନି ରିକ୍ସାକୁ । ବରଂ ଅଟୋ ଓ ଅନ୍ୟ ଗାଡିକୁ କରୁଛି ଭରସା । ସିଧାସଳଖ କୁହାଯାଇପାରେ କି ଆଧୁନିକତାର ସ୍ପର୍ଶରେ ସିଲଭରସିଟିରେ ଅଟୋ ରିକ୍ସାର ଚମକରେ ଫିକା ପଡି ଯାଇଛି ସାଧାରଣ ରିକ୍ସାର ଚାହିଦା । ନୀରବ ହୋଇଯାଇଛନ୍ତି ରିକ୍ସା ଚାଳକ । କିନ୍ତୁ ହଜୁଥିବା ଏହି ରିକ୍ସାର ଚମକ ପୁଣି ଫେରିବା ଦରକାର ବୋଲି ଅନୁଭବ କରନ୍ତି କଟକିଆ ।