କଟକ: ଜଗତଜନନୀ ମା’ ଦୁର୍ଗତିନାଶିନୀ ଦୁର୍ଗାଙ୍କ ମହା ଆଡମ୍ବରରେ ପାଳନ ହେଉଛି ମହା ନବମୀ ପୂଜା । ହୋମଯଜ୍ଞ, ମନ୍ତ୍ରପାଠରେ କମ୍ପୁଛି ପୁରପଲ୍ଲୀ । ସହରରେ ସୃଷ୍ଟି ହୋଇଛି ଭକ୍ତିମୟ ପରିବେଶ । ତେବେ ମହାନବମୀରେ କୁମାରୀ ପୂଜାର ରହିଛି ବିଶେଷ ପରମ୍ପରା । କଟକ ହରିପୁର ଦୋଳମୁଣ୍ଡାଇ ପୂଜା ମଣ୍ଡପରେ ଏହି ପୂଜାକୁ ନିଆରା ଭାବରେ କରାଯାଇଛି। ମା’ଙ୍କ ଏହି ନଅ ରୂପକୁ ଦର୍ଶନ କଲେ ମନସ୍କାମନା ପୂରଣ ହୋଇଥାଏ ବିଶ୍ବାସ ରହିଛି।
ନବଦୁର୍ଗା ରୂପରେ କୁମାରୀଙ୍କୁ ପୂଜା
ନବମୀ ପୂଜାରେ କୁମାରୀ ପୂଜାର ବିଧି ରହିଛି । ବିଧି ଅନୁଯାୟୀ 9 ଜଣ ଶିଶୁକନ୍ୟାଙ୍କ ପ୍ରଥମେ ପାଦ ଧୌତ କରି ସେମାନଙ୍କୁ ମା’ଙ୍କ ବେଶରେ ସଜା ଯାଇଥାଏ । ଏହାପରେ ନୂତନ ବସ୍ତ୍ର ପିନ୍ଧାଇ ସେମାନଙ୍କ ପାଦରେ ଅଳତା ଲଗାଯାଇଥାଏ ଓ ଫୁଲ ମାଳ ପିନ୍ଧାଯାଇ ପୂଜାର୍ଚ୍ଚନା କରାଯାଇଥାଏ। ମା’ଙ୍କ ନଅ ରୂପରେ ନବମୀ ଦିନ କୁମାରୀ ପୂଜା କରାଯିବାର ବିଧି ରହିଛି। କଟକ ଦୋଳମୁଣ୍ଡାଇ ପୂଜା ମଣ୍ଡପ ଏହି ପୂଜାକୁ ପ୍ରତ୍ୟକ ବର୍ଷ ନିଆରା ଭାବରେ କରିଥାଏ ।