ଇଦ-ଉଲ-ଜୁହା; ସକାଳ 10ଟା ଭିତରେ ସରିବ ନମାଜ ପାଠ

ଇଦ ଉଲ ଜୁହା ପର୍ବ ପାଇଁ କଟକରେ ସ୍ଥିର ହେଲା ନମାଜ ପାଠ ସମୟ । ଇଦଗାହ ପଡିଆରେ 10ଟା ସମୟରେ ସାମୁହିକ ନମାଜ ପାଠ ହେବ । ସୁରୁଖୁରରେ ଇଦ ଉଲ ଜୁହା ପର୍ବ ପାଳନ ହେବ ବୋଲି ସୂଚନା ଦେଇଛନ୍ତି କଟକ ଡିସିପି ।

କଟକ: ରାତି ପାହିଲେ ଇଦ ଉଲ ଜୁହା ପର୍ବ । ଇଦକୁ ନେଇ କଟକରେ ସମସ୍ତ ମସଜିଦରେ ପ୍ରସ୍ତୁତି ଶେଷ ହୋଇଛି । ଏହା ଆସନ୍ତା କାଲିଠୁ ଆରମ୍ଭ ହୋଇ ବୁଧବାର ପର୍ଯ୍ୟନ୍ତ ଚାଲିବ । ଏନେଇ ସିଲଭର ସିଟିର ସମସ୍ତ ମସଜିଦରେ ସାମୁହିକ ନମାଜ ପାଇଁ ସମୟ ନିର୍ଧାରିତ ହୋଇଛି ।

ଇଦଗାହ ପଡିଆରେ 10ଟା ସମୟରେ ସାମୁହିକ ନମାଜ ପାଠ ହେବାର ସ୍ଥିର ହୋଇଛି । ସେହିପରି କଦମ ଏ ରସୁଲରେ ସାମୁହିକ ନମାଜ ସକାଳ 7.30 ଓ 8.30ରେ ପାଠ ଅନୁଷ୍ଠିତ ହେବ ।

ଅନ୍ୟପକ୍ଷେ ଏହି ବଡ଼ ପର୍ବ ପାଇଁ କମିଶନରେଟ ପୋଲିସର ସୁରକ୍ଷା ବଳୟ ମଧ୍ୟରେ ରହିଛି କଟକ ସହର । ଗତବର୍ଷ ପରି ଚଳିତବର୍ଷ ମଧ୍ୟ ସୁରୁଖୁରରେ ଇଦ ଉଲ ଜୁହା ପର୍ବ ପାଳନ ହେବ ବୋଲି ସୂଚନା ଦେଇଛନ୍ତି କଟକ ଡିସିପି ।

କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ