କଟକ:ଝୁଲା ପୋଲରେ ଧବଳେଶ୍ବର ପୀଠକୁ ଯାଇ ପାରିବେନି ଭକ୍ତ । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧବଳେଶ୍ୱର ପୀଠରେ ଲାଗୁ ହେଲା କଟକଣା । ଏଣୁ ଝୁଲା ପୋଲରେ ଯାଇ ଧବଳେଶ୍ବରଙ୍କୁ ଦର୍ଶନ କରିପାରିବେ ନାହିଁ ଭକ୍ତ । ଗୁଜୁରାଟର ମୋର୍ବିରେ ଝୁଲାପୋଲ ଭୁଶୁଡିବା ପରେ ଧବଳେଶ୍ବର ପୀଠରେ ୧୪୪ ଧାରା ଲାଗୁ କରାଯାଇଛି । ବର୍ତ୍ତମାନ କାର୍ତ୍ତିକ ମାସ ଥିବାରୁ ମନ୍ଦିରକୁ ଅଧିକ ଭକ୍ତଙ୍କ ସମାଗମ ହେଉଛି । ତେଣୁ ପୀଠକୁ ସଂଯୋଗ କରିଥିବା ଝୁଲା ପୋଲଟି ଅତି ଖରାପ ଅବସ୍ଥାରେ ରହିଛି । କିଛି ଅଘଟଣ ଘଟିବା ପୂର୍ବରୁ ଯାତାୟତ ଉପରେ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ କଟକଣା ଜାରି କରାଯାଇଛି । ଏନେଇ ସୂଚନା ଦେଇଛନ୍ତି କଟକ ଜିଲ୍ଲାପାଳ ଡ. ଭବାନୀ ଶଙ୍କର ଚୟିନୀ ।
ସେହିପରି ଡଙ୍ଗା ଦ୍ୱାରା ଏତେ ସଂଖ୍ୟକ ଶ୍ରଦ୍ଧାଳୁଙ୍କ ଦର୍ଶନ କରାଇବା ସମ୍ଭବପର ନୁହେଁ ବୋଲି ଜିଲ୍ଲାପାଳ ସ୍ପଷ୍ଟ କରିଛନ୍ତି । ତେବେ ଏହି ନିର୍ଦ୍ଦେଶନାମା ଯୋଗୁଁ ଅନିର୍ଦ୍ଧିଷ୍ଟ କାଳ ପାଇଁ ଧବଳେଶ୍ବର ପିଠକୁ ଶ୍ରଦ୍ଧାଳୁଙ୍କ ଯିବା ଉପରେ କଟକଣା ଲଗାଯାଇଛି । ବଡ଼ କଥା ହେଉଛି ଆଗକୁ ଧବଳେଶ୍ବରଙ୍କ ପ୍ରସିଦ୍ଧ ବଡ଼ ଓଷା ପର୍ବ ପାଳିତ ହେବାକୁ ଥିବାରୁ ଚଳିତବର୍ଷ ବଡ ଓଷାରେ ଧବଳେଶ୍ବରଙ୍କୁ ଭକ୍ତଙ୍କ ଦର୍ଶନ କରିବା ନେଇ ସନ୍ଦେହ ସୃଷ୍ଟି ହୋଇଛି । ତେବେ ଗତ ଦୁଇ ବର୍ଷ କୋରୋନା କଟକଣା ଯୋଗୁଁ ପଞ୍ଚୁକରେ ମନ୍ଦିରରୁ ପ୍ରବେଶ କରିପାରିନଥିଲେ ଭକ୍ତ, ଚଳିତ ବର୍ଷ ପଞ୍ଚୁକରେ ଭଗବାନଙ୍କୁ ଦର୍ଶନ କରିବା ପାଇଁ ଆଶା ରଖିଥିବା ବେଳେ ଏହି କଟକଣା ଲାଗିବା ପରେ ଦୁଃଖ ପ୍ରକାଶ କରିଛନ୍ତି ।