ତେଜିଲା ଛାତ୍ର ସଂସଦ ନିର୍ବାଚନ ଦାବି, କଟକରେ ଏବିଭିପିର ବିକ୍ଷୋଭ ପ୍ରଦର୍ଶନ

ରାଜ୍ୟରେ ଛାତ୍ର ସଂସଦ ନିର୍ବାଚନ ବନ୍ଦ ନେଇ ତେଜୁଛି ଅସନ୍ତୋଷ । ନିର୍ବାଚନ ନକଲେ ଆନ୍ଦୋଳନର ଚେତାବନୀ ଦେଲା ଏବିଭିପି । ଅଧିକ ପଢନ୍ତୁ

କଟକ: ଛାତ୍ର ସଂସଦ ନିର୍ବାଚନ ବନ୍ଦ ନେଇ ତେଜୁଛି ଅସନ୍ତୋଷ । ଏହା ବିରୋଧରେ ବିଭିନ୍ନ ସଂଗଠନ ପକ୍ଷରୁ ରାଜ୍ୟବ୍ୟାପୀ ଆନ୍ଦୋଳନ କରାଯାଉଛି । ଏହି କ୍ରମରେ କଟକରେ ମଧ୍ୟ ଗତକାଲି(ଗୁରୁବାର) ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ABVP) ବିକ୍ଷୋଭ ପ୍ରଦର୍ଶନ କରିଛି । ଏବିଭିପି ପକ୍ଷରୁ ରେଭେନ୍ସା ବିଶ୍ବବିଦ୍ୟାଳୟର ମୁଖ୍ୟ ଫାଟକ ଆଗରେ ପ୍ରତିବାଦ କରାଯାଇଛି । ରାଜ୍ୟ ସରକାର ନେତୃତ୍ବର ଭୃଣହତ୍ୟା କରୁଛନ୍ତି । ଜାଣି ଶୁଣି ଛାତ୍ର ସଂସଦ ନିର୍ବାଚନକୁ ବନ୍ଦ କରୁଥିବା ଆନ୍ଦୋଳନକାରୀ ଅଭିଯୋଗ ଆଣିଛନ୍ତି । ନିର୍ବାଚନ ବନ୍ଦ ହୋଇଗଲେ କ୍ୟାମ୍ପସରେ ଶୈକ୍ଷିକ ବାତାବରଣ ନଷ୍ଟ ହୁଏ ନାହିଁ ବରଂ ଛାତ୍ରଛାତ୍ରୀ ନେତୃତ୍ୱ ନେବା ଶିଖିବେ । ତେଣୁ ତୁରନ୍ତ ଏହି ନିର୍ବାଚନ କରିବାକୁ ଦାବି କରିଛି ଏବିଭିପି ।

କ୍ରମାଗତ ଷଷ୍ଠ ଥର ପାଇଁ ଛାତ୍ର ସଂସଦ ନିର୍ବାଚନ ନକରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ଉଚ୍ଚଶିକ୍ଷା ବିଭାଗର ଏକାଡେମିକ ତାଲିକାରେ ନିର୍ବାଚନ ନଥିବାରୁ ଚଳିତ ବର୍ଷର ନିର୍ବାଚନ ହେବନାହିଁ । ଏହାକୁ ନେଇ ରାଜ୍ୟ ଛାତ୍ର ବିଜେଡି ସଭାପତି ଦେବୀ ରଞ୍ଜନ ତ୍ରିପାଠୀ କହିଥିଲେ ଯେ, ୨୦୧୮ରୁ ଛାତ୍ର ସଂସଦ ନିର୍ବାଚନ ବନ୍ଦ ରହିଛି । ନିର୍ବାଚନ ହେଲେ ଶୈକ୍ଷିକ ବାତାବରଣ ନଷ୍ଟ ହେବା ସହ ପାଠପଢ଼ାରେ ବାଧା ସୃଷ୍ଟି ହୋଇଥାଏ । ଠିକ୍ ସମୟରେ ୟୁଜି ଓ ପିଜି ଛାତ୍ରଛାତ୍ରୀଙ୍କ ରେଜଲ୍ଟ ପ୍ରକାଶ ପାଇବାରେ ବିଳମ୍ବ ହୋଇଥାଏ । ସେହିପରି ନିର୍ବାଚନରେ ଲିଙ୍ଗିଡୋ କମିଶନଙ୍କ ନିୟମକୁ ବି କେହି ମାନନ୍ତି ନାହିଁ । ଏସବୁକୁ ଦୃଷ୍ଟିରେ ରଖି ଉଚ୍ଚଶିକ୍ଷା ବିଭାଗ ଛାତ୍ର ସଂସଦ ନିର୍ବାଚନ ବନ୍ଦ କରିବା ପାଇଁ ନିଷ୍ପତ୍ତି ନେଇଛି । ମାତ୍ର ଛାତ୍ରଛାତ୍ରୀଙ୍କ ପାଇଁ ଛାତ୍ର ବିଜେଡି କ୍ୟାମ୍ପସ କମିଟିର ବ୍ୟବସ୍ଥା ହୋଇଛି । ରାଜ୍ୟର ସମସ୍ତ ମହାବିଦ୍ୟାଳୟ ଓ ବିଶ୍ଵବିଦ୍ୟାଳୟରେ କ୍ୟାମ୍ପସ କମିଟି କରାଯାଇଛି ।

ଉଚ୍ଚଶିକ୍ଷା ବିଭାଗର ଏହି ନିଷ୍ପତ୍ତି ବିଜୁ ଛାତ୍ର ଜନତା ଦଳ ସ୍ବାଗତ କରୁଛି ବୋଲି କହିବା ସହ ବିରୋଧୀଙ୍କ ପ୍ରତିକ୍ରିୟା ଉପରେ ବି କଡା ଜବାବ ଦେଇଥିଲେ ଦେବୀ ରଞ୍ଜନ । ଅନ୍ୟପଟେ ରାଜ୍ୟରେ ଛାତ୍ର ସଂସଦ ନିର୍ବାଚନ ଦାବି ତେଜିବାରେ ଲାଗିଛି । ଗତକାଲି ଛାତ୍ର କଂଗ୍ରେସ ଉଚ୍ଚଶିକ୍ଷା ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କ ବାସଭବନକୁ ଅଣ୍ଡାମାଡ କରିଥିଲା । ନିର୍ବାଚନ ବନ୍ଦ କରି ସରକାର ଛାତ୍ରଛାତ୍ରୀଙ୍କ ନ୍ୟାର୍ଯ୍ୟ ଅଧିକାରୀ ଛଡାଇ ନେଉଛନ୍ତି । ସାମ୍ବିଧାନିକ ଅଧିକାରକୁ ସଙ୍କୁଚିତ କରୁଛନ୍ତି ବୋଲି ଛାତ୍ର କଂଗ୍ରେସ ଅଭିଯୋଗ କରିଥିଲା ।

ଇଟିଭି ଭାରତ, କଟକ