କଟକ: ରାଜନୈତିକ ତିକ୍ତତାକୁ ନେଇ ଗୋଷ୍ଠୀ ସଂଘର୍ଷ । 6 ଜଣ ଆହତ ହୋଇଥିବାବେଳେ ସେଥିମଧ୍ୟରୁ 3 ଜଣ ଗୁରୁତର ଅଛନ୍ତି । କଟକ ଆଠଗଡ଼ ଥାନା କୁଲାଇଲୋ ପଞ୍ଚାୟତ ଗୈଡଝରିରେ ଏହି ଘଟଣା ଘଟିଥିବାବେଳେ ଗାଁରେ ଉତ୍ତେଜନା ନେଇ ପୋଲିସ ଫୋର୍ସ ମୁତୟନ ହୋଇଛନ୍ତି ।
ସୂଚନାଯୋଗ୍ୟ, ଗୈଡଝରି ଗାଁର ଉପେନ୍ଦ୍ର ବେହେରା ପଞ୍ଚାୟତ ନିର୍ବାଚନରେ ସମିତି ସଭ୍ୟ ପ୍ରାର୍ଥୀ ହୋଇ ପରାଜିତ ହୋଇଥିବାବେଳେ ଗାଁର ଏକ ଗୋଷ୍ଠୀ ତାଙ୍କୁ ଟାର୍ଗେଟ କରିଆସୁଥିଲେ । ତେବେ ଗତକାଲି ଉପେନ୍ଦ୍ର ଓ ତାଙ୍କ ବନ୍ଧୁ ଘରକୁ ଫେରୁଥିବା ସମୟରେ କଇଁଆ ଛକ ନିକଟରେ ସେହି ଗାଁର ରମେଶ ପରୋଇଙ୍କ ମଧ୍ୟରେ କଥାକଟି ହେବା ସହ ମାରପିଟ ଆରମ୍ଭ ହୋଇଥିଲା ।
ଭିଡିଓ ସୌଜନ୍ୟ: ସମ୍ବାଦଦାତା, କଟକ ଏଥିରେ ରମେଶ ଉତ୍ତ୍ୟକ୍ତ ହୋଇ ଏକ କଟୁରୀରେ ଉପେନ୍ଦ୍ରଙ୍କ ବନ୍ଧୁ ବିଜୟଙ୍କୁ ଆକ୍ରମଣ କରିଥିଲେ । ଏଥିରେ ବିଜୟ ଆହତ ହୋଇ ଆଠଗଡ଼ ଡାକ୍ତରଖାନାରେ ଚିକିତ୍ସିତ ହୋଇ ଫେରୁଥିବାବେଳେ ପୁଣି ଥରେ ଆକ୍ରମଣର ଶିକାର ହୋଇଥିଲେ । 5 ଜଣଙ୍କ ସହିତ ମିଶି ରମେଶ ପିରୋଇ କଟୁରୀରେ ବିଜୟଙ୍କ ମୁଣ୍ଡକୁ ଆଘାତ ଦେଇଥିଲେ । ଏହା ପରେ ଉଭୟ ଗୋଷ୍ଠୀ ମଧ୍ୟରେ ସଂର୍ଘଷ ହୋଇଥିଲା ।
ସେପଟେ ଖବର ପାଇ ଆଠଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରିବା ସହ ଚିକିତ୍ସିତ ପାଇଁ ଡାକ୍ତରଖାନାକୁ ପଠାଇଥିଲେ । ଏଥିସହ ଗାଁରେ ଉତ୍ତେଜନା ଲାଗି ରହିଥିବାବେଳେ ଗାଁରେ ପୋଲିସ ଫୋର୍ସକୁ ମୁତୟନ କରାଯିବା ସହ ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯିବ ବୋଲି କହିଛନ୍ତି ଆଠଗଡ ଥାନା ଅଧିକାରୀ ।
କଟକରୁ ପ୍ରଭୁକଲ୍ୟାଣ ପାଲ୍, ଇଟିଭି ଭାରତ
