କଟକ: ଆଚାର୍ଯ୍ୟ ହରିହର କର୍କଟ କେନ୍ଦ୍ରର କ୍ୟାନ୍ସର ରୋଗୀମାନଙ୍କର ପିଇଟି ସିଟି ସ୍କାନ ସହ ରାଜ୍ୟର ଅନ୍ୟ ସରକାରୀ ଚିକିତ୍ସାଳୟରେ ଏହି ଟେଷ୍ଟ ଖୁବଶୀଘ୍ର ହେବ ବୋଲି ସରକାରଙ୍କ ପକ୍ଷରୁ ହାଇକୋର୍ଟରେ ସତ୍ୟପାଠ ଦାଖଲ କରି କୁହାଯାଇଛି । ଆଚାର୍ଯ୍ୟ ହରିହର କର୍କଟ କେନ୍ଦ୍ର ପାଇଁ ଫେବୃଆରୀ ୩ ତାରିଖରେ ଟେଣ୍ଡର ହୋଇସାରିଛି । କ୍ୟାନ୍ସର ରୋଗୀମାନଙ୍କର ପିଇଟି ସିଟି ସ୍କାନ କର୍କଟ କେନ୍ଦ୍ର ସହ ରାଜ୍ୟର ଅନ୍ୟ ସରକାରୀ ଚିକିତ୍ସାଳୟରେ କି ବ୍ୟବସ୍ଥା କରାଯାଇଛି ସେ ସମ୍ପର୍କରେ ସତ୍ୟପାଠ ଦାଖଲ କରିବାକୁ ରାଜ୍ୟ ସରକାରଙ୍କୁ ହାଇକୋର୍ଟଙ୍କ ନିର୍ଦ୍ଦେଶ ଦେଇଥିଲେ । ସରକାରଙ୍କ ପକ୍ଷରୁ ଦାଖଲ ସତ୍ୟପାଠରେ ଭୁବନେଶ୍ବର କ୍ୟାପିଟାଲ ହସ୍ପିଟାଲ ଓ ଝାରସୁଗୁଡା ହସ୍ପିଟାଲରେ ଏହି ଚିକିତ୍ସା ଉପଲବ୍ଧ ହେବ ବୋଲି ଦର୍ଶାଯାଇଛି ।
ତେବେ କେବେ ସୁଦ୍ଧା ଏହା ଉପଲବ୍ଧ ହେବ ସେ ସମ୍ପର୍କରେ ଏପ୍ରିଲ ୫ ତାରିଖ ସୁଦ୍ଧା ସତ୍ୟପାଠ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି ଅଦାଲତ । ଏପ୍ରିଲ ୨୮ ରେ ମାମଲାର ପରବର୍ତ୍ତୀ ଶୁଣାଣି ପାଇଁ ଦିନ ଧାର୍ଯ୍ୟ ହୋଇଛି। ଆଚାର୍ଯ୍ୟ ହରିହର କର୍କଟ କେନ୍ଦ୍ର (ଆଚାର୍ଯ୍ୟ ହରିହର ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ ଅଫ୍ କ୍ୟାନସର)ରେ ପିଇଟି ସିଟି ସ୍କାନ୍ ମେସିନ୍ ନାହିଁ । ଫଳରେ କର୍କଟ ରୋଗୀମାନେ ବାହାରେ ଘରୋଇ ହସ୍ପିଟାଲ ଓ ପ୍ରତିଷ୍ଠାନରେ ଅଧିକ ଖର୍ଚ୍ଚାନ୍ତ ହୋଇ ପିଇଟି ସିଟି ସ୍କାନ କରାଉଛନ୍ତି । ଏଭଳି ଅଭିଯୋଗ ନେଇ ହାଇକୋର୍ଟରେ ଜନସ୍ବାର୍ଥ ମାମଲା ଦାୟର କରାଯାଇଥିଲା । ହାଇକୋର୍ଟରେ ଜଣେ କ୍ୟାନ୍ସର ରୋଗୀ ଅନିତା ବୁଦ୍ଧିଆଙ୍କ ପକ୍ଷରୁ ଏନେଇ ଜନସ୍ବାର୍ଥ ମାମଲା ଆବେଦନ କରାଯାଇଥିଲା । ଆବେଦନରେ ଦର୍ଶାଯାଇଥିଲା ଯେ ଅନିତା ନିଜେ ଜଣେ କର୍କଟ ରୋଗୀ ହୋଇଥିବା ବେଳେ ଗତ ବର୍ଷ ତାଙ୍କର ରୋଗ ଚିହ୍ନଟ ହୋଇଥିଲା । ରାଜ୍ୟ ବାହାରେ ଚିକିତ୍ସିତ ହେବା ପରେ ସେ ନିଜ ସହର କଟକରେ ଆଚାର୍ଯ୍ୟ ହରିହର କର୍କଟ କେନ୍ଦ୍ରକୁ ଯାଇଥିଲେ । କିନ୍ତୁ ଏଠାରେ ପିଇଟି ସିଟି ସ୍କାନ ନଥିବାରୁ ଘରୋଇ ପ୍ରତିଷ୍ଠାନରେ ଏହି ପରୀକ୍ଷା ତାଙ୍କୁ କରିବାକୁ ପଡିଥିଲା । ଗତ ବର୍ଷ ଚାରିଥର ସେ ପିଇଟି ସିଟି ସ୍କାନ କରିଥିବା ବେଳେ ଏଥି ପାଇଁ ଲକ୍ଷାଧିକ ଟଙ୍କା ତାଙ୍କୁ ଦେବାକୁ ପଡିଥିଲା । ପ୍ରତିଦିନ ଆଚାର୍ଯ୍ୟ ହରିହର କର୍କଟ କେନ୍ଦ୍ରକୁ ୫ଶହରୁ ଅଧିକ ରୋଗୀ ଚିକିତ୍ସା ପାଇଁ ଆସୁଥିବା ବେଳେ ପ୍ରାୟ ୨୫ରୁ ଅଧିକ ଜଣଙ୍କ ପିଇଟି ସିଟି ସ୍କାନ ପାଇଁ ପରାମର୍ଶ ଦିଆଯାଉଛି ।
ଶରୀର ଯେଉଁ ସ୍ଥାନରେ କର୍କଟ ରୋଗ ଚିହ୍ନଟ ହୋଇଥାଏ ତା ବାଦ ଅନ୍ୟ ସ୍ଥାନକୁ ଏହି ରୋଗ ବ୍ୟାପିଛି କି ନାହିଁ ସେ ନେଇ ପିଇଟି ସିଟି ସ୍କାନରୁ ଜଣା ପଡୁଥିବା ବେଳେ ଅଧିକାଂଶ ରୋଗୀଙ୍କୁ ନିୟମିତ ଭାବେ ଏହି ପରୀକ୍ଷା କରିବାକୁ ପଡିଥାଏ । ରୋଗୀମାନଙ୍କୁ ଏହି ପରୀକ୍ଷା ପାଇଁ ଘରୋଇ ପ୍ରତିଷ୍ଠାନରେ ପ୍ରାୟ ୨୩ ହଜାର ଟଙ୍କା ଦେବାକୁ ପଡୁଛି । ଭୁବନେଶ୍ବରର ଏକ ଘରୋଇ ହସ୍ପିଟାଲ ସହିତ କଟକ ସହର ଓ ଉପକଣ୍ଠରେ ଥିବା ଏକ ସ୍ବାସ୍ଥ୍ୟ ପ୍ରତିଷ୍ଠାନରେ ପିଇଟି ସିଟି ସ୍କାନ ରହିଛି । ରୋଗୀଙ୍କୁ ଖର୍ଚ୍ଚାନ୍ତ ହୋଇ ଏହି ସବୁ ଘରୋଇ ପ୍ରତିଷ୍ଠାନରେ ପିଇଟି ସିଟି ସ୍କାନ୍ କରିବାକୁ ପଡୁଛି । ଆଚାର୍ଯ୍ୟ ହରିହର କର୍କଟ କେନ୍ଦ୍ର ପୂର୍ବ ଭାରତର ପ୍ରମୁଖ କର୍କଟ ଚିକିତ୍ସା କେନ୍ଦ୍ର ହୋଇଥିବା ବେଳେ ସବୁ ଜିଲ୍ଲାରୁ ଓ ରାଜ୍ୟ ବାହାରୁ ରୋଗୀ ଏଠାକୁ ଆସୁଛନ୍ତି । ଏଭଳି ସ୍ଥିତିକୁ ଦୃଷ୍ଟିରେ ରଖି ବିଗତ ଦିନରେ ଏହି କର୍କଟ ଚିକିତ୍ସା କେନ୍ଦ୍ରରେ ଶଯ୍ୟା ସଂଖ୍ୟା ବୃଦ୍ଧି କରାଯାଇଛି । ଭିତ୍ତିଭୂମିର ବିକାଶ ପାଇଁ ସରକାର ଶହ ଶହ କୋଟି ଟଙ୍କା ଖର୍ଚ୍ଚ କରୁଛନ୍ତି । ଚିକିତ୍ସା ପାଇଁ ଅତ୍ୟାଧୁନିକ ଯନ୍ତ୍ରପାତି କିଣା ଯାଉଛି । କିନ୍ତୁ କେଉଁ ପରିସ୍ଥିତିରେ ପିଇଟି ସିଟି ସ୍କାନ ଭଳି ଜରୁରୀ ମେସିନ କିଣା ଯାଉନି ତାହାକୁ ନେଇ ଆବେଦନକାରୀ ପ୍ରଶ୍ନ ଉଠାଇଛନ୍ତି । ଗରିବ କର୍କଟ ରୋଗୀ ବାହାରେ ଖର୍ଚ୍ଚାନ୍ତ ହୋଇ ପିଇଟି ସିଟି ସ୍କାନ କରିବା ସମ୍ଭବ ହେଉ ନଥିବା ବେଳେ ସେମାନଙ୍କ ମୃତ୍ୟ ହେବା ନିଶ୍ଚିନ୍ତ । ଘରୋଇ ହସ୍ପିଟାଲ ଗୁଡିକୁ ସୁହାଇବାକୁ ଆଚାର୍ଯ୍ୟ ହରିହର କର୍କଟ କେନ୍ଦ୍ରରେ ପିଇଟି ସିଟି ସ୍କାନ ମେସିନ୍ ବସାଯାଉ ନାହିଁ ବୋଲି ଅଭିଯୋଗ ହୋଇଛି । ଏଥି ସହିତ ଇନଡୋର୍ ଓ ଆଉଟଡୋର୍ ରୋଗୀଙ୍କୁ ମାଗଣା ଔଷଧ ପ୍ରଦାନ ପାଇଁ ସରକାର ନିରାମୟ କେନ୍ଦ୍ର ଖୋଲା ଯାଇଛି । କିନ୍ତୁ ଅନେକ ସମୟରେ ନିରାମୟରେ ଆବଶ୍ୟକ ଔଷଧ ମିଳୁ ନାହିଁ ।