କଟକ : ଚିନ୍ତା ବଢ଼ାଉଛି କଟକ ତିନିଘରିଆ ନିର୍ମାଣାଧୀନ ରେଳ ଓଭର ବ୍ରିଜ (Cuttack Tinigharia Railway over bridge project ) । କାର୍ଯ୍ୟରେ ମନ୍ଥରତାକୁ ନେଇ ବଢୁଛି ସମସ୍ୟା। ମନ୍ଥର ଗତିରେ ଚାଲିଛି ରେଳ ଓଭର ବ୍ରିଜ ନିର୍ମାଣ । କେବେ ସରିବ ଏହି ନିର୍ମାଣାଧୀନ ରେଳ ଓଭରବ୍ରିଜ ତାହାରି ଅପେକ୍ଷାରେ କଟକବାସୀ। ତେବେ ଏହାକୁ ନେଇ କଟକ ଉନ୍ନୟନ ମଞ୍ଚ ମଧ୍ୟ ମୁହଁ ଖୋଲିଛି । ବ୍ରିଜ କାର୍ଯ୍ୟ ଆଜିକୁ ପାଞ୍ଚ ବର୍ଷ ହେବ ଚାଲୁଥିବା ବେଳେ ଏପର୍ଯ୍ୟନ୍ତ କାର୍ଯ୍ୟ ସରିପାରିଲା ନାହିଁ ।
ଫଳରେ ନୂଆବଜାରରୁ ପ୍ରେସ ଛକ ପର୍ଯ୍ୟନ୍ତ ସଂଯୋଗ କରୁଥିବା ରାସ୍ତାରେ ନାହିଁନଥିବା ଭିଡ ଦେଖିବାକୁ ମିଳୁଛି । ଖାଲିସେତିକି ନୁହେଁ ଭିଡ଼ ଯୋଗୁଁ ଅନେକ ରୋଗୀଙ୍କୁ ନେଇ ଯାଉଥିବା ଆମ୍ବୁଲାନ୍ସ ବି ଅନେକ ସମୟରେ ବାଟରେ ଅଟକି ରହୁଛି । ଯାହାଦ୍ବାରା ରୋଗୀଟି ନାନା ଯନ୍ତ୍ରଣା ଭୋଗିଥାଏ । ଏହି ରେଳ ଧାରଣାଟି ପାରାଦ୍ଵୀପ ବନ୍ଦରକୁ ସଂଯୋଗ କରିବ । ତେଣୁ ଅଞ୍ଚଳଟି ବ୍ୟସ୍ତବହୁଳ । ଏଠାରେ ଅନବରତ ରେଳ ଚଳାଚଳ କରୁଛି ।
ହେଲେ ୫ ବର୍ଷ ହେଲା ତିନିଘରିଆଠାରେ ରେଳ ଓଭର ବ୍ରିଜ ନିର୍ମାଣ କାମ ଶେଷ ହୋଇ ପାରୁନି । ଫଳରେ ଲକ୍ଷଲକ୍ଷ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି । ମାତ୍ର ଗୋଟିଏ 33 କେଭିର ବିଦ୍ୟୁତ୍ ଖୁଣ୍ଟ ଓ ପାଣି ପାଇପ ସ୍ଥାନାନ୍ତରିତ କରାଯାଇପାରୁନଥିବା ଯୋଗୁଁ ଏମିତି ବିଳମ୍ବ ଘଟୁଥିବା ପ୍ରଶାସନ କହିଛି, ଯାହା ହାସ୍ୟାସ୍ପଦ ।