ଘରୋଇ ସ୍କୁଲ ଫି' ହ୍ରାସ ନେଇ ଅଭିଭାବକ ମହାସଙ୍ଘର ଚେତାବନୀ

ମହାମାରୀ ଯୋଗୁଁ ସ୍କୁଲ ଫି' ହ୍ରାସ କରିବାକୁ ଉଚ୍ଚ ନ୍ୟାୟାଳୟଙ୍କ ଦ୍ବାରା ପ୍ରଦତ୍ତ ନିର୍ଦ୍ଦେଶକୁ ମାନୁନାହାଁନ୍ତି କଟକର କିଛି ଘରୋଇ ସ୍କୁଲ । ଅଭିଯୋଗ କଲା ଓଡିଶା ଅଭିଭାବକ ମହାସଙ୍ଘ । ଅଧିକ ପଢନ୍ତୁ...

କଟକ: ମହାମାରୀରେ ଆର୍ଥିକ ସମସ୍ୟା ନେଇ ପ୍ରାଇଭେଟ ସ୍କୁଲରେ ଫି ଆଦାୟ ହ୍ରାସ କରିବାକୁ ଉଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଥିଲେ । ହାଇକୋର୍ଟର ନିର୍ଦ୍ଦେଶରେ ରାଜ୍ୟ ସରକାର ପୂର୍ବରୁ ହୋଇଥିବା ଏମଓୟୁକୁ କାର୍ଯ୍ୟକାରୀ କରିବା ପାଇଁ ନିର୍ଦ୍ଦେଶାନାମା ଜାରି କରିଛନ୍ତି । ମାତ୍ର କଟକରେ ଥିବା ଘରୋଇ ସ୍କୁଲଗୁଡିକ ଏହି ନିର୍ଦ୍ଦେଶ କାର୍ଯ୍ୟକାରୀ କରୁନାହାଁନ୍ତି ବୋଲି ଓଡିଶା ଅଭିଭାବକ ମହାସଙ୍ଘ ସାମ୍ବାଦିକ ସମ୍ମିଳନୀ ଯୋଗେ ଅଭିଯୋଗ କରିଛି ।

ଯେଉଁ ସ୍କୁଲ ଏହି ନିର୍ଦ୍ଦେଶ ମାନୁନାହାଁନ୍ତି, ଜିଲ୍ଲା ଶିକ୍ଷାଧିକାରୀ ସେମାନଙ୍କର ସ୍ୱୀକୃତି ପ୍ରତ୍ୟାହାର ପାଇଁ ସରକାରଙ୍କୁ ସୁପାରିଶ କରନ୍ତୁ ବୋଲି କଟକ ଗାନ୍ଧୀ ଭବନଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ମହାସଙ୍ଘ ଦାବି କରିଛି । ଆହୁରିମଧ୍ୟ, କମ୍ ପିଲାସଂଖ୍ୟା ଦର୍ଶାଇ ରାଜ୍ୟ ସରକାର 11 ହଜାରରୁ ଅଧିକ ସରକାରୀ ସ୍କୁଲ ବନ୍ଦ କରିବାକୁ ଯେଉଁ ଅଗଣତାନ୍ତ୍ରିକ ନିଷ୍ପତ୍ତି ନେଇଛନ୍ତି ତାକୁ ପ୍ରଥମେ ସ୍ଥଗିତ କରିବା ସହିତ ନିର୍ବାଚିତ ଜନପ୍ରତିନିଧି, ସ୍କୁଲ ପରିଚାଳନା କମିଟି, ଗ୍ରାମବାସୀଙ୍କୁ ନେଇ ପରାମର୍ଶ ଓ ଆଲୋଚନା କରିବାକୁ ମହାସଂଘ କହିଛି l

ନିଷ୍ପତ୍ତି ପ୍ରତ୍ୟାହାର ନ ହେଲେ ରାଜ୍ୟରେ ଅଧାରୁ ପାଠ ଛାଡୁଥିବା ପିଲାଙ୍କ ସଂଖ୍ୟା ଅନେକ ବଢ଼ିଯିବ l ତେଣୁ ଏଭଳି ଜନବିରୋଧୀ, ଶିକ୍ଷା ବିରୋଧୀ ଓ ଅଗଣତାନ୍ତ୍ରିକ ନିଷ୍ପତ୍ତି ସ୍ଥଗିତ ନ ହେଲେ ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହେବୁ ବୋଲି ମହାସଂଘ ଚେତାବନୀ ଦେଇଛି l ଅନ୍ୟପଟେ କଟକ ଏସସିବି ମେଡିକାଲ ପବ୍ଲିକ ସ୍କୁଲକୁ ବନ୍ଦ ନିଷ୍ପତ୍ତି ପରିପ୍ରେକ୍ଷୀରେ ସ୍କୁଲର ଅଭିଭାବକମାନଙ୍କୁ ନେଇ ବାଲାଟ ମାଧ୍ୟମରେ ଜିଲ୍ଲା ପ୍ରଶାସନ ପକ୍ଷରୁ ମତାମତ ସଂଗ୍ରହ କରାଯାଇଥିଲା । ଉକ୍ତ ମତାମତ ବାକ୍ସକୁ ତୁରନ୍ତ ଖୋଲାଯାଇ ବହୁସଂଖ୍ୟକ ଅଭିଭାବକଙ୍କ ମତକୁ କାର୍ଯ୍ୟକାରୀ କରିବାକୁ ମହାସଂଘ ପକ୍ଷରୁ ଦାବି କରାଯାଇଛି ।

କଟକରୁ ନାରାୟଣ ସାହୁ, ଇଟିଭି ଭାରତ