ଡିଜିଙ୍କ ନବବର୍ଷ ଶୁଭେଚ୍ଛା; କହିଲେ ସୁରକ୍ଷା ବ୍ୟବସ୍ଥା ପାଇଁ ପ୍ରସ୍ତୁତ ଓଡିଶା ପୋଲିସ

ନୂଆବର୍ଷ ଅବସରରେ ଶୁଭ କାମନା ଜଣାଇଛନ୍ତି ରାଜ୍ୟ ପୋଲିସ ମହାନିର୍ଦ୍ଦେଶକ ଅଭୟ । ଓଡିଶା ପୋଲିସକୁ ପ୍ରଶଂସା କରିବା ସହ ନୂଆବର୍ଷରେ ଆହୁରି ନିଷ୍ଠାପର ଭାବରେ କାମ କରିବାକୁ ଆହ୍ବାନ ଦେଇଛନ୍ତି ଡିଜି ।

ଭୁବନେଶ୍ବର: ଆଉ କିଛି ସମୟର ଅପେକ୍ଷା । ଆସିଯିବ ନୂତନ ବର୍ଷ-2020 । ପୁରୁଣା ବର୍ଷକୁ ବିଦାୟ ଦେଇ ଶୁଭ ନବବର୍ଷକୁ ଖୁସିର ସହ ସ୍ବାଗତ କରିବେ ବିଶ୍ବବାସୀ । ଏହି ନୂଆବର୍ଷ ଅବସରରେ ଶୁଭ କାମନା ଜଣାଇଛନ୍ତି ରାଜ୍ୟ ପୋଲିସ ମହାନିର୍ଦ୍ଦେଶକ ଅଭୟ। ଓଡିଶା ପୋଲିସକୁ ରାଜ୍ୟବାସୀ ସାହାଯ୍ୟ କରିଥିବାରୁ କୃତଜ୍ଞତା ଜ୍ଞାପନ କରିଛନ୍ତି ପୋଲିସ ଡିଜି।

ନୂଆ ବର୍ଷରେ ଏଭଳି ସାହାଯ୍ୟ ସହଯୋଗ କରିବାକୁ ରାଜ୍ୟବାସୀଙ୍କୁ ଅନୁରୋଧ କରିଛନ୍ତି ଡିଜି । ସେହିପରି ଓଡିଶା ପୋଲିସର କାମକୁ ଡିଜି ପ୍ରଶଂସା କରିବା ସହ ନୂଆବର୍ଷରେ ଆହୁରି ନିଷ୍ଠାପର ଭାବରେ କାମ କରିବାକୁ ଓଡିଶା ପୋଲିସରେ କାର୍ଯ୍ୟରତ ସମସ୍ତଙ୍କୁ ଡିଜି ପରାମର୍ଶ ଦେଇଛନ୍ତି । ସେହିପରି ନୂଆବର୍ଷରେ ରାଜ୍ୟ ସରକାରଙ୍କ ୫ ଟି ଓ ‘ମୋ ସରକାର’ ଯୋଜନାକୁ ଆହୁରି କଡାକଡି ଭାବରେ କାର୍ଯ୍ୟକାରୀ କରିବାକୁ ଓଡିଶା ପୋଲିସ ପ୍ରତିଶୃତିବଦ୍ଧ ବୋଲି କହିଛନ୍ତି ଡିଜି ।

ସେହିପରି ଆଜି ଏବଂ ଆସନ୍ତାକାଲି ନୂଆବର୍ଷ ପାଳନ ପାଇଁ ରାଜ୍ୟରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ପୁରୀରେ ବ୍ୟାପକ ପୋଲିସ ସହ ଅଫିସର ନିୟୋଜିତ କରାଯାଇଛି । ସେହିପରି କଟକ, ଭୁବନେଶ୍ବର, ପୁରୀ, ସମ୍ବଲପୁର, ବ୍ରହ୍ମପୁର, ବାଲେଶ୍ଵର ଆଦି ସହର ମାନଙ୍କରେ ମଧ୍ୟ ନୂଆବର୍ଷ ପାଇଁ ବ୍ୟାପକ ପୋଲିସ ମୁତୟନ କରାଯାଇଥିବା ଡିଜି କହିଛନ୍ତି ।

କଟକରୁ ନାରାୟଣ ସାହୁ, ଇଟିଭି ଭାରତ