ଲିଭର ପ୍ରତ୍ୟାରୋପଣ ୟୁନିଟ ପାଇଁ ଆସିଥିଲା ଟଙ୍କା, ଖର୍ଚ୍ଚ ହୋଇଛି କୋଭିଡ ମୁକାବିଲାରେ ! କଟକ: ଏସସିବି ବଡ଼ ମେଡିକାଲରେ ବିଧାନସଭା ପିଏସି କମିଟି । ସବୁ ଦିଗରେ ପୁଙ୍ଖାନୁପୁଙ୍ଖ ତର୍ଜମା କରିବା ସହ ରୋଗୀ ସେବା କିପରି ହେଉଛି ତାହା ଉପରେ ମେଡିକାଲ କର୍ତ୍ତୃପକ୍ଷଙ୍କ ସହ ଆଲୋଚନା କରିଛି ପବ୍ଲିକ ଆକାଉଣ୍ଟ କମିଟି (PAC) ।
ଏସସିବିର ବିଭିନ୍ନ ବିଭାଗ ଅନୁଧ୍ୟାନ ପରେ କମିଟି ଅଧ୍ୟକ୍ଷ ମୋହନ ମାଝୀ କହିଛନ୍ତି ଲିଭର ପ୍ରତ୍ୟାରୋପଣ କରିବା ପାଇଁ 2013 ରେ ନିଷ୍ପତି ହୋଇଥିଲା । ପ୍ରାଥମିକ ସ୍ତରରେ LTU (ଲିଭର ପ୍ରତ୍ୟାରୋପଣ ୟୁନିଟ ) ପାଇଁ 12 କୋଟି 52 ଲକ୍ଷ ଟଙ୍କା ଓ ଅନ୍ୟାନ୍ୟ ସାରଞ୍ଜମ ପାଇଁ 21 କୋଟି 50 ଲକ୍ଷ ଟଙ୍କା ରାଜ୍ୟ ସରକାରଙ୍କ ପକ୍ଷରୁ ବ୍ୟବସ୍ଥା କରାଯାଇଥିଲା। ଏପରିକି 2015 ମସିହାରେ ଅର୍ଥ ମଧ୍ୟ ପ୍ରଦାନ କରିଥିଲେ ସରକାର । କିନ୍ତୁ ଏହାରି ଭିତରେ 8 ବର୍ଷ ବିତି ସାରିଛି। ନାଁ LTU ର ଅପରେସନ କୋଠରୀ ନିର୍ମାଣ ହୋଇଛି ନାଁ ଅନ୍ୟାନ୍ୟ ସାମଗ୍ରୀ ଆସିଛି । କେବଳ ଟଙ୍କାର ଅପଚୟ ସ୍ପଷ୍ଟ ବାରି ହୋଇପଡୁଛି ।
ଏହାବି ପଢନ୍ତୁ- ସରକାରୀ ଟଙ୍କା ଆତ୍ମସାତ କରୁଛି ଜଳସମ୍ପଦ ବିଭାଗ, ଫିଲଡ ଭିଜିଟ କରିବ PAC କମିଟି
ମୋହନ ଅଭିଯୋଗ କରିଛନ୍ତି ଗୋଟିଏ ପଟେ ଏସସିବି ବଡ଼ ମେଡିକାଲକୁ ବିଶ୍ବ ସ୍ତରୀୟ ଏମସ ପ୍ଲସ କରିବା ପାଇଁ ରାଜ୍ୟ ସରକାରଙ୍କ ପ୍ରଚେଷ୍ଟା ଜାରି ରହିଛି । ଏହାରି ଭିତରେ ଏପରି ଅପରେସନ ଗୃହ ନିର୍ମାଣ ଦିଗରେ ଯେଉଁ ପଦକ୍ଷେପ ଗ୍ରହଣ କରଯାଇଛି ତାହା ବେଶ ନିନ୍ଦନୀୟ । ସେହିପରି ଟ୍ରମା କେୟାର ସେଣ୍ଟରରେ LTU ଅପରେସନ ଥିଏଟର କିପରି ନିର୍ମାଣ କରଯାଇଛି ତାହା ମଧ୍ୟ ବର୍ତ୍ତମାନ ବଡ଼ ପ୍ରଶ୍ନ। ଯେଉଁ ଟଙ୍କା ବିଭିନ୍ନ ସରଞ୍ଜମ ପାଇଁ ଆସିଥିଲା ସେହି ଟଙ୍କା କୋଭିଡ ସମୟରେ ଖର୍ଚ୍ଚ କରଯାଇଛି । ଅନ୍ୟାନ୍ୟ ଜିନିଷ ମଧ୍ୟ କିଣାଯାଇଥିବା ସ୍ପଷ୍ଟ ହେଉଛି ବୋଲି କହିଛନ୍ତି ମୋହନ । । ଏନେଇ କମିଟି ଏକ ଆକ୍ସନ ରିପୋର୍ଟ ପ୍ରସ୍ତୁତ କରିବ। ଏହାପରେ ଆସନ୍ତା ବୈଠକରେ ଏହା ଉପରେ ଆଲୋଚନା ପରେ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରାଯିବ ବୋଲି କହିଛନ୍ତି ।
ସୂଚାନଯୋଗ୍ୟଯେ ଏସସିବି ମେଡିକାଲ କଲେଜକୁ ଏମସ ପ୍ଲସ କରିବାକୁ ଅଣ୍ଟା ଭିଡିଛନ୍ତି ରାଜ୍ୟ ସରକାର । ସମ୍ପ୍ରସାରଣ କାର୍ଯ୍ୟ ଦ୍ରୁତ ଗତି ରେ ଆଗେଇ ଚାଲିଛି। ଖୁବ ଶୀଘ୍ର ନୂଆ ରୁପରେ ନଜର ଆସିବ ଏସସିବି ବଡ଼ ମେଡିକାଲ। ଏନେଇ ରାଜ୍ୟ ସରକାର ନିର୍ମାଣ କାମ ଜାରି ରଖିଛନ୍ତି । ରୋଗୀ ସେବା ଶୀଘ୍ର ଓ ତ୍ବରିତ ଡ଼ଙ୍ଗରେ କିପରି ହୋଇ ପାରିବ ତାହା ଉପରେ ଫୋକସ କରୁଛନ୍ତି ରାଜ୍ୟ ସରକାର। ତେବେ ଆଜି PAC କମିଟି ଯାଞ୍ଚ ପରେ ସରକାର କେଉଁ ଆଭିମୁଖ୍ୟ ଗ୍ରହଣ କରୁଛନ୍ତି ତାହାରି ଉପରେ ନଜର।
ଇଟିଭି ଭାରତ, କଟକ
