କଟକ: ଚୌଦ୍ବାରରେ କ୍ରିକେଟ ଖେଳ ସମୟରେ ହତ୍ୟାକାଣ୍ଡ ମାମଲାରେ କାର୍ଯ୍ୟାନୁଷ୍ଠାନ ନେଇଛି ପୋଲିସ । ସମସ୍ତ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ଚୌଦ୍ବାର ଥାନା ପୋଲିସ । ଆଜି ଡାକ୍ତରୀ ମାଇନା ପରେ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି । ସବୁଠାରୁ ବଡ଼ କଥା ହେଉଛି, ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରେ ୨ ଜଣ କଲେଜ ଛାତ୍ର ଅଛନ୍ତି । ସେହିପରି ଅଭିଯୁକ୍ତଙ୍କ ବିରୋଧରେ IPCର ଧାରା ୩୦୨ ଓ ୩୪ରେ ମାମଲା ରୁଜୁ କରାଯାଇଥିବା କଟକ ଡିସିପି ପିନାକ ମିଶ୍ର ସୂଚନା ଦେଇଛନ୍ତି । ତେବେ ହଠାତ ଉତ୍କ୍ଷିପ୍ତ ହୋଇ ଅଭିଯୁକ୍ତମାନେ ଏଭଳି କାଣ୍ଡ ଭିଆଇଥିବା ପ୍ରାଥମିକ ତଦନ୍ତରୁ ଜଣା ପଡ଼ିଥିବା କହିଛନ୍ତି ଡିସିପି ।
ଚୌଦ୍ବାର ଲକି ରାଉତ ହତ୍ୟାକାଣ୍ଡ ମାମଲାର ସମସ୍ତ ୪ ଜଣ ଅଭିଯୁକ୍ତଙ୍କୁ ଆଜି ଗିରଫ କରିଛି ଚୌଦ୍ବାର ଥାନା ପୋଲିସ । ମୁଖ୍ୟ ଅଭିଯୁକ୍ତ ସ୍ମୃତିରଞ୍ଜନ ରାଉତଙ୍କ ସମେତ ସଂଗ୍ରାମ ରାଉତ, ସଞ୍ଜୟ ରାଉତ ଓ ବାଦଲ କୈବତଳଙ୍କୁ ଗିରଫ କରିଛି ପୋଲିସ । ଚୌଦ୍ବାର ପୋଲିସ ସମସ୍ତ ଅଭିଯୁକ୍ତଙ୍କୁ ଗିରଫ କରିବା ପରେ ଆଜି କୋର୍ଟ ଚାଲାଣ କରିଛି । ତେବେ ଗିରଫ ହୋଇଥିବା ୪ ଅଭିଯୁକ୍ତଙ୍କ ମଧ୍ୟରେ ସ୍ମୃତିରଞ୍ଜନ ରାଉତ ଓ ସଂଗ୍ରାମ ରାଉତ କଲେଜ ଛାତ୍ର ଅଟନ୍ତି । ସ୍ମୃତିରଞ୍ଜନ ଚୌଦ୍ବାର କଲେଜର ଯୁକ୍ତ ୩ର ଛାତ୍ର ହୋଇଥିବା ବେଳେ ସଂଗ୍ରାମ ITI ଛାତ୍ର ବୋଲି ଜଣା ପଡିଛି । ତେବେ ଏହି ଘଟଣାରେ ଗିରଫ ହୋଇଥିବା ସଞ୍ଜୟ ରାଉତ ଓରଫ ମୁଗୁନି ନାଁରେ ପୂର୍ବରୁ ଅନେକ ଅପରାଧିକ ଅଭିଯୋଗ ଥିବା ଜଣାଡିଛି । ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଥିବା ବେଳେ ଅଭିଯୁକ୍ତମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି ସ୍ଥାନୀୟ ବାସିନ୍ଦା ।