ନିଆଳି:ଗଣେଶ ପୂଜା ଦିନ ଠାରୁ ନିଖୋଜ ଥିବା ଖୋର୍ଦ୍ଧା ବନମାଳିପୁର ଅଞ୍ଚଳର ଛାତ୍ରଙ୍କ ମୃତ୍ୟୁଦେହ ଉଦ୍ଧାର(Missing Student body Recovered) । ମଙ୍ଗଳବାର ସନ୍ଧ୍ୟାରେ ଭାର୍ଗବୀ ନଦୀର ସାଇଫନ ନିକଟରୁ ତାଙ୍କର ମୃତଦେହ ଠାବ ହୋଇଛି । ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଛି । ମୃତକ ହେଉଛନ୍ତି ଖୋର୍ଦ୍ଧା ଜିଲ୍ଲା ବାଲିପାଟଣା ଥାନା ବନମାଳିପୁର ଅଞ୍ଚଳ ଅନ୍ତର୍ଗତ ଡେରାସାହି ଗ୍ରାମର ନାରାୟଣ ପୃଷ୍ଟିଙ୍କ ପୁଅ ନୃସିଂହ ପୃଷ୍ଟି (୧୭) । ସେ ସାତ ଦିନ ହେଲାଣି ନିଖୋଜ ଥିଲେ । ତେବେ ଛାତ୍ରଙ୍କ କେଉଁ ପରିସ୍ଥିତିରେ ତାଙ୍କର ମୃତ୍ୟୁ ଘଟିଲା, ଏହା ହତ୍ୟା ନା ଆତ୍ମହତ୍ୟା ଏଭଳି ଅନେକ ପ୍ରଶ୍ନବାଚୀ ଏବେ ସୃଷ୍ଟି ହୋଇଛି ।
ସୂଚନା ମୁତାବକ, ନୃସିଂହ ଜଣେ କଲେଜ ଛାତ୍ର ଅଟନ୍ତି । ଗତ ୩୧ ତାରିଖ ଅର୍ଥାତ୍ ଗଣେଶ ପୂଜା ଦିନ ଅପରାହ୍ନରୁ ସେ କୁଆଡେ ନିଖୋଜ ହୋଇଯାଇଥିଲେ । ପରିବାର ଲୋକେ ବହୁ ଖୋଜାଖୋଜି କରିବା ପରେ ମଧ୍ୟ ତାଙ୍କର କୌଣସି ପତ୍ତା ମିଳିନଥିଲା । ହେଲେ ଗତକାଲି(ମଙ୍ଗଳବାର) ସନ୍ଧ୍ୟାରେ କୋଶଲ୍ୟାଗଙ୍ଗା ଫାଣ୍ତି ଅଧିନ ପୂବା ଶାସନ ଜଳ ସମ୍ପଦ କାର୍ଯ୍ୟାଳୟ ନିକଟ ଭାର୍ଗବୀ ନଦୀ ସାଇଫନ ନିକଟରୁ ନୃସିଂହ ପୃଷ୍ଟିଙ୍କ ମୃତଦେହ ଠାବ ହୋଇଛି । ନୃସିଂହଙ୍କ ପ୍ୟାଣ୍ଟ ଏବଂ ସାର୍ଟ ଦେଖି ପରିବାର ଲୋକେ ପୁଅକୁ ଚିହ୍ନଟ କରିଥିଲେ । ଅଗ୍ନିଶ୍ରମ ବିଭାଗ ତାଙ୍କ ମୃତଦେହ ନଦୀରୁ ଉଦ୍ଧାର କରିଛି ।
ମୃତଦେହଟି ପଚି ଯାଇଥିବା ବେଳେ ଶରୀରରେ ବିଭିନ୍ନ ସ୍ଥାନରେ କ୍ଷତ ଚିହ୍ନ ରହିଥିବାର ଦେଖିବାକୁ ମିଳିଛି । ତେବେ ନୃସିଂହ କିପରି ନଦୀକୁ ଆସିଲେ ? କେମିତି ତାଙ୍କର ମୃତ୍ୟୁ ହେଲା ? ଏନେଇ ପରିବାର ଲୋକେ ଚିନ୍ତାରେ । କେହି ହତ୍ୟା କରି ନଦୀକୁ ଫିଙ୍ଗି ଦେଇଛି ନା ସେ ନିଜେ ଆତ୍ମହତ୍ୟା କରିଛନ୍ତି ତାହା ସ୍ପଷ୍ଟ ହୋଇପାରିନାହିଁ ।