ନିଆଳି: ସଂଗଠନକୁ ସୁଦୃଢ଼ କରିବା ସହିତ ଦଳକୁ ପୁଣିଥରେ ଶାସନକୁ ଫେରାଇ ଆଣିବା ପାଇଁ ଭାରତୀୟ ଜାତୀୟ କଂଗ୍ରେସ ପକ୍ଷରୁ ରାହୁଲ ଗାନ୍ଧୀଙ୍କ ନେତୃତ୍ବରେ ସାରା ଦେଶରେ ଚାଲିଛି ଭାରତ ଯୋଡ଼ ପଦଯାତ୍ରା । ତେବେ ରାହୁଲ ଗାନ୍ଧୀ ଏହି ପଦଯାତ୍ରାରେ ଓଡ଼ିଶା ଆସୁନଥିବାବେଳେ, ରାଜ୍ୟ କଂଗ୍ରେସ କିନ୍ତୁ ରାଜ୍ୟରେ ଭାରତ ଯୋଡ଼ ପଦଯାତ୍ରା ନେଇ ପ୍ରସ୍ତୁତି ଆରମ୍ଭ କରିଛି । ଏହି ପରିପ୍ରେକ୍ଷୀରେ ଆଜି କଟକ ଜିଲ୍ଲା ନିଆଳି କଂଗ୍ରେସ ତରଫରୁ ଭାରତ ଯୋଡ଼ ପଦଯାତ୍ରାର ଆୟୋଜନ କରାଯାଇଥିଲା । ଏଥିରେ ଅନେକ ଜିଲ୍ଲା ତଥା ରାଜ୍ୟ ସ୍ତରୀୟ ନେତା ଯୋଗ ଦେଇଥିଲେ ।
ଭାରତ ଯୋଡ଼ ପଦଯାତ୍ରା ଦେଶରେ ବଢ଼ି ଚାଲିଥିବା ବେକାରୀ ସମସ୍ୟା ଓ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଦରଦାମ ବୃଦ୍ଧି ବିରୋଧରେ ପ୍ରତିବାଦ କରୁଛି କଂଗ୍ରେସ । ରାହୁଲ ଗାନ୍ଧୀ ଏହି ପଦଯାତ୍ରା ଦ୍ବାରା ଦେଶର ୧୨ରୁ ଅଧିକ ରାଜ୍ୟରେ କେନ୍ଦ୍ର ସରକାରଙ୍କର ବିଫଳତା ପହଞ୍ଚାଇବାକୁ ଲକ୍ଷ ରଖିଥିବାବେଳେ, ଏଥିରେ କିନ୍ତୁ ଓଡ଼ିଶାକୁ ଅନ୍ତର୍ଭୁକ୍ତ କରାଯାଇନାହିଁ । ତେବେ ପିସିସି ସଭାପତିଙ୍କ ନେତୃତ୍ବରେ ରାଜ୍ୟରେ ଭାରତ ଯୋଡ଼ ପଦଯାତ୍ରା କରିବାକୁ ସ୍ଥିର କରିଛି ଦଳ ।