ସନ୍ଧ୍ୟାରେ ପିଚୁ ପଡିଲା, ରାତି ନପାହୁଣୁ ଉଠିଗଲା

Low Quality Road Work: ସନ୍ଧ୍ୟାରେ ପିଚୁ ପଡିଲା, ସକାଳୁ ଉଠିଗଲା । ଦିନକ ପାଇଁ ବି କାମରେ ଆସିଲାନି ରାସ୍ତା । ଏଭଳି ନିମ୍ନମାନର ରାସ୍ତା କାମ ହୋଇଥିବା ଅଭିଯୋଗ ଆସିଛି କଟକ ଜିଲ୍ଲା ନିଆଳି ବ୍ଳକ୍‌ରୁ । ଅଧିକ ପଢ଼ନ୍ତୁ

ନିଆଳି: ସନ୍ଧ୍ୟାରେ ପିଚୁ ପଡ଼ିଲା, ସକାଳୁ ଉଠିଗଲା । ଏଭଳି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ନିଆଳି ବ୍ଳକରେ । ଜଲ୍ଲାରପୁରଠାରୁ ପହଙ୍ଗା R&B ବିଭାଗ ଅଧୀନରେ ଥିବା ରାସ୍ତା ନିର୍ମାଣ କରାଗଲା । ଦୀର୍ଘ ବର୍ଷ ଧରି ପ୍ରତିବାଦ ପରେ ରାଜ୍ୟ ସରକାର ରାସ୍ତା ମରାମତି ପାଇଁ ବ୍ୟୟବରାଦ କରିଥିଲେ । ହେଲେ ରାସ୍ତା ନିର୍ମାଣ ନିମ୍ନମାନର ହୋଇଥିବା ଅଭିଯୋଗ କରି ସ୍ଥାନୀୟ ଲୋକେ ଅସନ୍ତୋଷ ବ୍ୟକ୍ତ କରିବା ସହିତ ଭିଡିଓ ଉତ୍ତୋଳନ କରିଥିଲେ । ଯାହା ଭାଇରାଲ ହେବା ପରେ ଘଟଣାଟି ସାମ୍ନାକୁ ଆସିଛି । ସୂଚନା ଅନୁସାରେ, ଏହି ରାସ୍ତା ପାଇଁ ରାଜ୍ୟ ସରକାର ପାଖାପାଖି ୧୬ କୋଟି ୬୬ ଲକ୍ଷ ଟଙ୍କା ମଞ୍ଜୁର କରିଛନ୍ତି । ଏହି ରାସ୍ତା ୨୦୨୪ ଜାନୁଆରୀ ୨୪ ତାରିଖରେ ଶେଷ ହେବ ବୋଲି ଦିନ ଧାର୍ଯ୍ୟ କରିଛନ୍ତି ସରକାର ।

ଏହି କାର୍ଯ୍ଯକୁ ତଦାରଖ କରିଛନ୍ତି ରାସ୍ତା ଓ କୋଠାବାଡ଼ି ଡିଭିଜନ-୨ କଟକ (ଆର୍ ଆଣ୍ଡ ବି) ବିଭାଗ । ଜଲ୍ଲାରପୁରରୁ ପହଙ୍ଗା ରାସ୍ତାର ଯାଞ୍ଚ ଏବଂ ତଦାରଖ କରିବା ପାଇଁ କନିଷ୍ଠ ଯନ୍ତ୍ରୀ, ସହକାରୀ ଯନ୍ତ୍ରୀ ଏବଂ ନିର୍ବାହୀ ଯନ୍ତ୍ରୀଙ୍କୁ ନିର୍ଦ୍ଦେଶ ରହିଛି । ହେଲେ ଗତ ଦୁଇଦିନ ତଳେ ରାସ୍ତାରେ ପିଚୁ ପଡିଥିବାବେଳେ ସକାଳ ସମୟରେ ପିଚୁ ସହିତ ଗୋଡି ଉଠିଯାଇଥିବା ଦେଖିବାକୁ ମିଳିଛି । ଯାହାଫଳରେ ସ୍ଥାନୀୟ ଲୋକମାନେ ଅସନ୍ତୋଷ ପ୍ରକାଶ କରିବା ସହିତ ଭିଡିଓ ଉତ୍ତୋଳନ କରି ସାମାଜିକ ଗଣମାଧ୍ୟମରେ ଭାଇରାଲ କରିଥିବା ଜଣାପଡିଛି ।

"ଗୋଟିଏ ଦିନ ମଧ୍ୟ ଏହି ପିଚୁ ରାସ୍ତା ଲୋକଙ୍କ ବ୍ୟବହାରଯୋଗ୍ୟ ନୁହେଁ, ତେବେ କିଭଳି ବର୍ଷ ବର୍ଷ ଧରି ଲୋକଙ୍କ କାର୍ଯ୍ୟରେ ଆସିବ ?" ପ୍ରଶ୍ନ କରିଛନ୍ତି ସ୍ଥାନୀୟଲୋକେ । ଏନେଇ ନିଆଳି ଆର୍ ଆଣ୍ଡ ବି ବିଭାଗର କନିଷ୍ଠ ଯନ୍ତ୍ରୀ ପୁଷ୍ପଲତା ସାହୁଙ୍କୁ ଫୋନ ମାଧ୍ୟମରେ ପ୍ରତିକ୍ରିୟା ପାଇଁ ଯୋଗାଯୋଗ କରାଯାଇଥିଲା । କିନ୍ତୁ ସେ ଫୋନ୍‌ ଉଠାଇନାହାନ୍ତି କି କୌଣସି ପ୍ରତିକ୍ରିୟା ରଖ ନାହାନ୍ତି ।

ସେପଟେ R&B ସହକାରୀ ଯନ୍ତ୍ରୀ ମନୋଜ ମୁଞ୍ଜଙ୍କ ସହିତ ଯୋଗାଯୋଗ କରାଯିବା ପରେ ସେ କହିଛନ୍ତି, "ସନ୍ଧ୍ୟାରେ କାମ ହେଉଥିଲା । ଗାଡ଼ି ଚାଲିଲା ପରେ କେଉଁଠି କ'ଣ ଡିଫେକ୍ଟ ହୋଇଥିବ ତାକୁ ମରାମତି କରାଯିବ, କାମ ଚାଲିଛି । ଲୋକ ତ ଏମିତି ହେବେ ।" ଯଦି ରାସ୍ତା ନିର୍ମାଣ ଏଭଳି ହୁଏ ତେବେ ରାସ୍ତାର ସ୍ଥାୟୀତ୍ବ ପ୍ରତି ଗ୍ୟାରେଣ୍ଟି କିଏ ଦେବ ବୋଲି ସାଧାରଣରେ ପ୍ରଶ୍ନ ଉଠିଛି ।

ଇଟିଭି ଭାରତ, ନିଆଳି