କଟକ: ପୋଲିସ କହିଲେ ସମସ୍ତେ ଭାବନ୍ତି କଠୋର ଓ ନିର୍ଦ୍ଦୟ । କିନ୍ତୁ ପୋଲିସର ଆଉ ଏକ ଚେହେରାକୁ ବି ବହୁତ କମ ଲୋକ ଦେଖିପାରନ୍ତି ।
ଯାହା ଆଜି ସିଲଭର ସିଟି ପୋଲିସ ଦେଖାଇଛି । ନିଜର ନୁହେଁ । କିନ୍ତୁ ନିଜ ମାଆ ପରି ଜଣେ ଅସହାୟ ମହିଳାଙ୍କୁ ଖୁଆଇ ଦେଇଥିଲେ ଜଣେ ମହିଳା ସବ ଇନ୍ସପେକ୍ଟର । ଫିଲ୍ମ କାହାଣୀ ଭଳି ଲାଗୁଥିଲେ ମଧ୍ୟ ଏହା ସତ ଘଟଣା । ସବଇନ୍ସପେକ୍ଟର ଜଣକ କଟକ ମହିଳା ଥାନାର ବର୍ଷା ମହାନ୍ତି । ସିଲଭର ସିଟି ଦରଘା ବଜାର ଅଞ୍ଚଳରେ ଘଟିଛି ଏହି ହୃଦୟସ୍ପର୍ଶୀ ଘଟଣା । ଦେଖିଲେ ଆଖିରୁ ଲୁହ ଟୋପାଏ ଗଡିବ ନିଶ୍ଚିତ ।
ଜଣେ ମାନସିକ ବିକାରଗ୍ରସ୍ତ ମହିଳା ଦରଘା ବଜାର ଅଞ୍ଚଳରେ ରାସ୍ତାରେ ଯାଉଥିଲେ । ଏହି ସମୟରେ କିଛି ପୋଲିସ କର୍ମଚାରୀ ତାଙ୍କୁ ଶୁଖିଲା ଖାଦ୍ୟ ଦେଇଥିଲେ । କିନ୍ତୁ ସେ ନଖାଇ ତଳେ ପକାଇ ଦେଇଥିଲେ । ଏହି ସମୟରେ ବର୍ଷା ମହାନ୍ତି ତାଙ୍କୁ ଭାତ ଡାଲମା ଆଣି ଖାଇବାକୁ ଦେଲେ । ତଥାପି ସେ ନଖାଇବାରୁ ତାଙ୍କୁ ସେ ନିଜ ହାତରେ ପୁଡିଆ ଖୋଲି ପାଟିରେ ଖୁଆଇ ଦେଇଥିଲେ । ଆଉ ମହିଳା ଜଣକ ଏଥର ପ୍ରତିବାଦ ନକରି ଚୁପଚାପ ଖାଇଦେଇଥିଲେ । ଏହା ପରେ ବର୍ଷା ତାଙ୍କୁ କିଛି ବିସ୍କୁଟ ଏବଂ ପାଉଁରୁଟି ଖାଇବାକୁ ଦେଇଥିଲେ ।
ଏପରି ସମୟରେ ଲୋକେ ଘରୁ ବାହାରୁନାହାନ୍ତି । ଦୁଃଖି ଅସହାୟଙ୍କ କଥା କିଏ ବୁଝିବ । କିନ୍ତୁ ଯେଉଁଠି ବର୍ଷାଙ୍କ ଭଳି ଝିଅ ଅଛନ୍ତି, ସେଠାରେ କେହି ନିରାଶ୍ରୟା ନିଜକୁ ଏକା ମନେ କରିବନି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
