‘ମିଥ୍ୟା ଅଭିଯୋଗରେ ଜେଲ୍‌ରେ ଚକି ପେଷିଲି, ଏବେ ନ୍ୟାୟ ଦରକାର’

ତିନି ବର୍ଷ ପରେ ମିଳିଲା ନ୍ୟାୟ । ଏକ ମିଥ୍ୟା ଦୁଷ୍କର୍ମ ମାମଲାରେ ଫସିଥିଲେ କଟକର ଏକ୍ରାମ ଖାନ୍ । ଗଣମାଧ୍ୟମ ସମ୍ମୁଖରେ ବଖାଣିଲେ ନିଜ ଦୁଃଖ କାହାଣୀ ।

କଟକ: ରେଭେନ୍ସା ବିଶ୍ବବିଦ୍ୟାଳୟର ପୂର୍ବତନ ଛାତ୍ର ତଥା ସ୍ଥାନୀୟ ଅଲିସା ବଜାର ନିବାସୀ ଏକ୍ରାମ ଖାନ । ଏକ ଦୁଷ୍କର୍ମ ଅଭିଯୋଗରେ ତାଙ୍କୁ 2016ରେ ପ୍ରାୟ 1 ମାସ ଜେଲଦଣ୍ଡ ଭୋଗିବାକୁ ପଡ଼ିଥିଲା । ତେବେ ମାମଲାଟି କେବଳ ରାଜନୈତିକ ଷଡ଼ଯନ୍ତ୍ର ଥିଲା ବୋଲି ଦର୍ଶାଇବା ସହ ତାଙ୍କୁ ଆଜି ନିର୍ଦ୍ଦୋଷ ପ୍ରମାଣିତ କରିଛନ୍ତି କଟକ ଜିଲ୍ଲା ଜଜ୍ । ଏହାପରେ ନିଜ ପ୍ରତି ହୋଇଥିବା ଅନ୍ୟାୟକୁ ଆଜି ଗଣମାଧ୍ୟମ ସମ୍ମୁଖରେ ବଖାଣିଛନ୍ତି ଏକ୍ରାମ ।

‘ଦୀର୍ଘଦିନ ଧରି ମାନସିକ ନିର୍ଯାତନା ସହି ଆସୁଛି । ସୋସିଆଲ ମିଡ଼ିଆ ଏବଂ ଲୋକଙ୍କ ନିକଟରେ ମୋର ଚରିତ୍ର ସଂହାର କରାଯାଇଛି । ବହୁ ସମ୍ମାନହାନି ଘଟିଛି । ମୋର ପାଠପଢ଼ା ବି ଶେଷ କରିପାରିଲିନି’ ବୋଲି ଏକ୍ରାମ କହିଛନ୍ତି । ଏକ ମିଥ୍ୟା ଅଭିଯୋଗରେ ଏଭଳି ଅପବାଦ ସହିଥିବା ଏକ୍ରାମ ବର୍ତ୍ତମାନ ନ୍ୟାୟ ଦାବି କରିଛନ୍ତି । ଅଭିଯୋଗକାରିଣୀଙ୍କ ନାମରେ ସେ ମାନହାନୀ ମକଦ୍ଦମା ରୁଜୁ କରିବେ ବୋଲି ଜଣାଇଛନ୍ତି ଏବଂ ତାଙ୍କ ସହ ଉଚିତ୍ ନ୍ୟାୟ ହେବ ବୋଲି ଆଶା ରଖିଛନ୍ତି ।

ସୂଚନାଯୋଗ୍ୟ ଯେ ରେଭେନ୍ସା ବିଶ୍ୱବିଦ୍ୟାଳୟରେ ପାଠ ପଢ଼ୁଥିବା ସମୟରେ ଏକ୍ରାମଙ୍କ ନାଁରେ ଜଣେ ଯୁବତୀ ଏହି ଅଭିଯୋଗ ଆଣିଥିଲେ । 10 ଅଗଷ୍ଟ 2016ରେ ସ୍ଥାନୀୟ ବାଦାମବାଡି ଥାନାରେ ତାଙ୍କ ନାଁରେ ମାମଲା ରୁଜୁ ହୋଇଥିଲା । ଶେଷରେ ପୋଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ଏବଂ ସେହି ମାସ 23 ତାରିଖରୁ ସେ ପ୍ରାୟ ମାସେ ପର୍ଯ୍ୟନ୍ତ ଜେଲ୍ ଦଣ୍ଡ ଭୋଗିଥିଲେ । ଏବେ ନିର୍ଦ୍ଦୋଷ ପ୍ରମାଣିତ ହେବାପରେ ସେ ନ୍ୟାୟ ଦାବି କରିଛନ୍ତି ।

କଟକରୁ ପ୍ରଭୁକଲ୍ୟାଣ ପାଲ୍, ଇଟିଭି ଭାରତ