କଟକ: କଟକ ମହାନଗର ନିଗମ (CMC)ର ଏକ ଘରୋଇ କମ୍ପାନୀ ‘ସ୍ୱର୍ଣ୍ଣ ଦେବୀ ଏଜେନ୍ସି’ ପ୍ରତି ଏତେ ମୋହ କାହିଁକି । ସ୍ୱାମୀ CMC ରେ କର୍ମଚାରୀ ଓ ସ୍ତ୍ରୀଙ୍କ ନାଁରେ ଥିବା ଏଜେନ୍ସିକୁ ଯାଉଛି ଲକ୍ଷ ଲକ୍ଷ ଟଙ୍କାର ଟେଣ୍ଡର । ଏପରି ଅଭିଯୋଗ କରିଛନ୍ତି ବିରୋଧୀ କର୍ପୋରେଟର । ଯାହାକୁ ନେଇ CMCର ଗତ ଦୁଇଟି କାଉନସିଲ ବୈଠକରେ ତୁମ୍ବି ତୋଫାନ ଦେଖିବାକୁ ମିଳିଥିଲା । ଏମିତିକି ବୈଠକ ମୁଲତବୀ ମଧ୍ୟ ହୋଇଥିଲା । କଟକ ମହାନଗର ନିଗମ ପକ୍ଷରୁ ଏକ ରୁଲିଂ ଜାରି ହୋଇଥିଲା ଯେ, 7 ଦିନ ମଧ୍ୟରେ ଏହି ଦିଗରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏହା ମଧ୍ୟରେ 7 ଦିନ ପୁରିଛି । ତଥାପି ସିଏମସିର ପଦକ୍ଷେପ ଶୂନ୍ୟ । ଏନେଇ ଗତକାଲି(ଗୁରୁବାର) ଉଭୟ ବିଜେପି ଓ କଂଗ୍ରେସର ସମସ୍ତ କର୍ପୋରେଟର CMC କମିଶନର ନିଖିଲ ପବନ କଲ୍ୟାଣଙ୍କୁ ଭେଟି ଏହି ସମ୍ପର୍କରେ ପୁଙ୍ଖାନୁପୁଙ୍ଖ ଆଲୋଚନା କରିଛନ୍ତି ।
କର୍ପୋରେଟରଙ୍କ କହିବାନୁଯାୟୀ, ଦୁଇ ଦୁଇ ଥର କାଉନସିଲ ବୈଠକରେ ଏହି ସଙ୍ଗୀନ ପ୍ରସଙ୍ଗ ଉଠିଥିଲା ବେଳେ CMC କୌଣସି ଦିଗରେ ପଦକ୍ଷେପ ନେଉନାହିଁ । ତେବେ ବର୍ତ୍ତମାନ ସମୟରେ ଯଦି ଏହି ଦିଗରେ କୌଣସି ପଦକ୍ଷେପ ନନିଆଯାଏ ତେବେ ଆଗାମୀ କାଉନସିଲକୁ ଅଚଳ କରାଯିବା ସହ ସ୍ୱାୟତ୍ତ ଶାସନ ଦିବସକୁ କଳା ଦିବସ ରୂପରେ ପାଳନ କରାଯିବ ବୋଲି ଚେତାବନୀ ଦେଇଛନ୍ତି କଂଗ୍ରେସ କର୍ପୋରେଟର ସନ୍ତୋଷ ଭୋଳ । ସେହିପରି ଏହି ଘଟଣା ଏବେ ହାଟରେ ପଡି ଦାଣ୍ଡରେ ଗଡ଼ିଲାଣି । ଏହି ଦିବରେ ସିଏମସିର ନୀରବତା ଅନ୍ୟକିଛି ଦିଗ ନିର୍ଦ୍ଧାରିତ କରୁଛି । ତେଣୁ ଯଦି ଏହି ଦିଗରେ କୌଣସି ଦୃଷ୍ଟାନ୍ତ ମୂଳକ କାର୍ଯ୍ୟନୁଷ୍ଠାନ ନନିଆଯାଏ ତେବେ ସିଧାସଳଖ ଆଇନର ଆଶ୍ରୟ ନିଆଯିବ ବୋଲି ବିଜେପି କର୍ପୋରେଟର ଗଗନ ଓଝା ଚେତାବନୀ ଦେଇଛନ୍ତି ।