କଟକ: କଠିନ ପରିଶ୍ରମ ଓ ନିଜର ଦୃଢ଼ ମନୋବଳ ଆଗରେ ହାର ମାନିଛି ସମାଜର ଟାହି, ଟାପରା । ଓଡ଼ିଶାର ପ୍ରଥମ କିନ୍ନର ଭାବେ ରାଜ୍ୟ ତଥା ସମଗ୍ର କିନ୍ନର ସମାଜ ପାଇଁ ଗର୍ବ ଏବଂ ଗୌରବ ଆଣିଛନ୍ତି ଦୀପା । ସେ ରାଜ୍ୟର ପ୍ରଥମ କିନ୍ନର ଭାବେ ପିଏଚଡି କରିବେ । ଉତ୍କଳ ବିଶ୍ବବିଦ୍ୟାଳୟରେ ବଟନୀ ବିଭାଗରେ ପିଏଚଡି କରିବା ପାଇଁ ଚୟନ ହୋଇଛନ୍ତି । ସମାଜରେ କିନ୍ନରଙ୍କୁ ଭିନ୍ନ ଦୃଷ୍ଟିରେ ଦେଖୁଥିବା ବେଳେ ଦୀପା କିନ୍ନରଙ୍କ ରୋଲ ମଡେଲ ପାଲଟିଛନ୍ତି ।
କଟକ ହରିପୁର ଅଞ୍ଚଳର ଦୀପା କିନ୍ନର । ବାପା ଓ ମାଆଙ୍କ ନଜରରେ ଦିନେ ଦୀପା ପୁଅ ଥିଲେ । ସେଥିପାଇଁ ପରିବାର ଲୋକେ ବେଶ ଖୁସି ଥିଲେ । କିନ୍ତୁ ଭଗବାନଙ୍କ ସୃଷ୍ଟି କିଛି ଅଲଗା । ପୁଅ ହେଲେ ମଧ୍ଯ ଦୀପାଙ୍କୁ ପୁଅଙ୍କ ପୋଷାକ ଭଲ ଲାଗୁନଥିଲା । ସେଥିପାଇଁ ଷଷ୍ଠ ଶ୍ରେଣୀରେ ପଢୁଥିବା ବେଳେ ଅର୍ଥାତ୍ ୧୨ବର୍ଷ ବୟସରୁ ପାଲଟିଗଲେ ଝିଅ । ପରେ ପରିବାର ଲୋକଙ୍କ ନିନ୍ଦା ଅପବାଦ ସାଙ୍ଗକୁ ସମାଜ ଆଖିରେ ସେ ଘୃଣ୍ୟ ଏବଂ ତାତ୍ସଲ୍ୟର ପାତ୍ର ହୋଇଥିଲେ । ସଂକୀର୍ଣ୍ଣ ମାନସିକତାର ଲୋକେ 'ଛକା, ମାଇଚିଆ' କହି ଉପହାସ କଲେ । କିନ୍ତୁ ସେବେ ହାର ମାନି ନଥିଲେ ଦୀପା । ନିଜ ଲକ୍ଷ୍ୟକୁ ମଜଭୁତ କରି ଆଜି ସେ ଉଦ୍ଭିଦ ବିଜ୍ଞାନ(ବଟନୀ)ରେ ପିଏଚଡି ଡ଼ିଗ୍ରୀ ପାଇଁ ପ୍ରଥମ କିନ୍ନର ଭାବେ ଉତ୍କଳ ବିଶ୍ବବିଦ୍ୟାଳୟରେ ନାମ ଲେଖାଇଛନ୍ତି ।