କଟକ:କଟକ ମହାନଦୀ ବିହାର ଡକାୟତି ଘଟଣାର ପର୍ଦ୍ଦାଫାଶ କରିଛି କଟକ କମିଶନରେଟ ପୋଲିସ । ଡକାୟତି ମାମଲାରେ ସମ୍ପୃକ୍ତ ଥିବା ମୋଟ 5ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିଛି । ଏହାସହ ସେମାନଙ୍କ ଠାରୁ ନଗଦ 1ଲକ୍ଷରୁ ଅଧିକ ଟଙ୍କା ଜବତ କରିଛି ପୋଲିସ । ସେହିପରି 7ଟି ମୋବାଇଲ ଫୋନ ସହ ଡକାୟତିରେ ବ୍ୟବହୃତ ହୋଇଥିବା ଏକ କାର୍ ଏବଂ ଲୁଟ୍ ଟଙ୍କାରେ କିଣା ଯାଇଥିବା ଏକ ନୂଆ ବାଇକ ମଧ୍ୟ ଜବତ ହୋଇଛି ।
ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରୁ 2ଜଣ ଓଡିଶାର ହୋଇଥିବା ବେଳେ ଅନ୍ୟ 3 ଜଣ ଝାଡ଼ଖଣ୍ଡ ବାସିନ୍ଦା । ଏହି ମାମଲାର ମୁଖ୍ୟ ଅଭିଯୁକ୍ତ ଚିତ୍ତରଞ୍ଜନ ଓ ଦୀପ୍ତିରଞ୍ଜନ ଗୋଟିଏ ଅଫିସରେ ଆଗରୁ କାମ କରୁଥିଲେ । ଦୀପ୍ତିରଞ୍ଜନ ଦୀପ୍ତି ପଟ୍ଟନାୟକଙ୍କ ସମ୍ପର୍କୀୟ ଥିଲେ । ତେଣୁ ଦୀପ୍ତି ପଟ୍ଟନାୟକଙ୍କ ଟଙ୍କା କାରବାର ସମ୍ପର୍କରେ ସମସ୍ତ ତଥ୍ୟ ଜାଣିଥିଲେ ଦୀପ୍ତିରଞ୍ଜନ ।
ଘରେ ଟଙ୍କା ଥିବା କଥା ଦୀପ୍ତିରଞ୍ଜନ ଚିତ୍ତରଞ୍ଜନଙ୍କୁ କହିଥିଲେ । ଏନେଇ ଚିତ୍ତ ନିଜ ସାଙ୍ଗ ତାପସକୁ କହିଥିଲା । ପରେ ତାପସ ଝାରଖଣ୍ଡ ବାସିନ୍ଦା ସାଗର, ବିଜୟ ପଟେଲ, ଗଣେଷ ପ୍ରସାଦ ସୋନି ଓ ଦୀପକ ଝାଙ୍କୁ ଏନେଇ ସୂଚନା ଦେଇଥିଲେ । ଏହାପରେ ସମସ୍ତ ଅଭିଯୁକ୍ତ ଦୁଇ ଦିନ ଧରି ରେକି କରିବା ପରେ 21 ତାରିଖ ଦିନ ସକାଳୁ ଲୁଟ୍ କରିଥିଲେ । ଏହି ମାମଲାରେ ସମ୍ପୃକ୍ତ ଥିବା ଅନ୍ୟତମ ଅଭିଯୁକ୍ତ ସାଗର ଏପର୍ଯ୍ୟନ୍ତ ଧରାପଡିନଥିବାବେଳେ, ଖୁବଶୀଘ୍ର ଗିରଫ କରାଯିବ ବୋଲି କହିଛନ୍ତି ଡିସିପି ।