ରାସ୍ତା ଚଉଡା ପାଇଁ ଜବରଦଖଲ ଉଚ୍ଛେଦ, ବ୍ୟବସାୟୀଙ୍କ ପ୍ରତିବାଦ

ଜବର ଦଖଲ ଉଚ୍ଛେଦକୁ ନେଇ ନିଆଳି ପ୍ରଶାସନ ଓ ବ୍ୟବସାୟୀ ମୁହାଁମୁହିଁ । ଆଗ ଥଇଥାନା ନ କରି ଉଚ୍ଛେଦ କରିବା ଘଟଣାକୁ ନେଇ ଉତ୍ତେଜନା । ଅଧିକ ପଢନ୍ତୁ

ନିଆଳି:ଅଣ ଓସାରିଆ ରାସ୍ତା ଚଉଡ଼ା ହେବା ନେଇ ଖର୍ଚ୍ଚ ହେବ କୋଟିକୋଟି ଟଙ୍କା ।‌ ଏନେଇ ବର୍ଷ ବର୍ଷ ଧରି ସରକାରୀ ଯାଗାକୁ ଜବରଦଖଲ କରି ବ୍ୟବସାୟ କରୁଥିବା ବ୍ୟବସାୟୀଙ୍କ ଦୋକାନ ଉପରେ ବୁଲଡୋଜର ଚଳାଇଛି ନିଆଳି ପ୍ରଶାସନ । ଫଳରେ ବ୍ୟବସାୟୀ ପ୍ରତିବାଦ କରିବା ସହିତ ଆଗ ଥଇଥାନ ଏବଂ ପରେ ଉଚ୍ଛେଦ କରିବାକୁ ଦାବି କରିଛନ୍ତି । ଯାହାକୁ ନେଇ ନିଆଳି ତହସିଲଦାରଙ୍କ ସହ ଯୁକ୍ତିତର୍କ ହୋଇଥିବା ସୂଚନା ମିଳିଛି ।

ସୂଚନା ଅନୁସାରେ, କଟକ ଜିଲ୍ଲା ନିଆଳି ତହସିଲ ଅଧୀନସ୍ଥ ଜଲ୍ଲାରପୁରରେ ଅଣ ଓସାରିଆ ରାସ୍ତାକୁ PWD ବିଭାଗ ରାସ୍ତା ନିର୍ମାଣ ପାଇଁ ଟେଣ୍ଡର ପ୍ରକ୍ରିୟା ସାରିବା ସହିତ ରାସ୍ତା କାର୍ଯ୍ୟ ଆରମ୍ଭ ହୋଇ ସାରିଲାଣି । ପହଙ୍ଗା ବଜାରର ରାସ୍ତାର ଦୁଇ ପାର୍ଶ୍ଵରେ ଗଢ଼ି ଉଠିଛି ଦୋକାନ ବଜାର । ଏହି ଦୋକାନ ବଜାର ଯୋଗୁଁ ରାସ୍ତା ସଙ୍କୁଚିତ ହେଉଛି ଏବଂ ଯାନ ବାହାନ ଚଳାଚଳରେ ବାଧାପ୍ରାପ୍ତ ହେଉଥିବା ନେଇ ଅଭିଯୋଗ ହୋଇ ଆସୁଛି ।‌ ତେଣୁ ପହଙ୍ଗା ବଜାରରେ ବେଆଇନ ଜବରଦଖଲକାରୀଙ୍କୁ ନିଆଳି ତହସିଲ ପକ୍ଷରୁ ଉଚ୍ଛେଦ କରାଯାଉଛି ।

ତେବେ ଏହି ଉଚ୍ଛେଦ କାର୍ଯ୍ୟକୁ ନେଇ କିଛି ସମୟ ଉତ୍ତେଜନା ପ୍ରକାଶ ପାଇବା ସହିତ ନିଆଳି ତହସିଲଦାରଙ୍କ ସହିତ ଯୁକ୍ତିତର୍କ ହୋଇଥିଲା । ଗତ ୧୦ ଦିନ ପୂର୍ବରୁ ନିଆଳି ତହସିଲ କାର୍ଯ୍ୟାଳୟ ପକ୍ଷରୁ ଜବରଦଖଲକାରୀଙ୍କୁ ନୋଟିସ ସହିତ ଡାକବାଜି ଯନ୍ତ୍ର ସାହାଯ୍ୟରେ ସରକାରୀ ଯାଗାରୁ ଉଚ୍ଛେଦ ପାଇଁ ସୂଚନା ଦିଆଯାଇଥିଲା । ତେଣୁ ସରକାରୀ ନିଷ୍ପତ୍ତି କ୍ରମେ ବ୍ୟାପକ ପୋଲିସ ଫୋର୍ସ ସହାୟତାରେ ପହଙ୍ଗା ବଜାରରୁ ଉଚ୍ଛେଦ କାର୍ଯ୍ୟ ଆରମ୍ଭ ହୋଇଛି ।‌ ନିଆଳି ତହସିଲଦାର ବିଦ୍ୟାଧର ପତି ଉଚ୍ଛେଦ କାର୍ଯ୍ୟକୁ ଅତି ସତର୍କତାର ସହିତ ତୁଲାଇଛନ୍ତି । ସେପଟେ ଥଇଥାନ ପରେ ଉଚ୍ଛେଦ କରାଯାଉଛି ବୋଲି ଦାବି କରିଥିଲେ ବ୍ୟବସାୟୀ । ‌

ଇଟିଭି ଭାରତ, ନିଆଳି