କଟକ:କୁଖ୍ୟାତ ଅପରାଧୀ ମଙ୍ଗୁକୁ ଏନକାଉଣ୍ଟର ପ୍ରସଙ୍ଗରେ ପ୍ରତିକ୍ରିୟା ଦେଇଛନ୍ତି କଟକ ଡିସିପି ପିନାକ ମିଶ୍ର। ମଙ୍ଗୁ ନାଁରେ ପୂର୍ବରୁ କେବଳ ଯେ ଅନେକ ଡକାୟତି ମାମଲା ରହିଥିଲା। ଗତ ୬ ତାରିଖରେ କନ୍ଦରପୁର ନିକଟସ୍ଥ ମତ୍ତଗଜପୁରଠାରେ ସଶସ୍ତ୍ର ଡକାୟତି ଘଟଣାରେ ମଧ୍ୟ ମଙ୍ଗୁ ସାମିଲ ଥିଲା। ତା'ର ସହଯୋଗୀ ସହ ମିଶି ଜଣେ ବ୍ୟବସାୟୀଙ୍କୁ ବନ୍ଧୁକ ଦେଖାଇ ଟଙ୍କା ଏବଂ ସୁନା ଲୁଟି ନେଇଥିଲା। ଏନେଇ ଅଭିଯୋଗ ପରେ ପୋଲିସ ଏହାର ତଦନ୍ତ କରିଥିଲା। ସ୍ଥାନୀୟଲୋକଙ୍କୁ ପଚରାଉଚରା କରିବା ସହ ଅନେକ ଅପରାଧୀଙ୍କୁ ବି ଏହି ଘଟଣାରେ ପଚରାଉଚରା କରିଥିଲା ପୋଲିସ।
ଡିସିପି ପିନାକ ମିଶ୍ର କହିଛନ୍ତି, "ମଙ୍ଗୁ ଏହି ସଶସ୍ତ୍ର ଡକାୟତି ଘଟଣାରେ ମୁଖ୍ୟ ଅଭିଯୁକ୍ତ ଜାଣିବାକୁ ମିଳିଥିଲା । ଏହି ଘଟଣାରେ ମଙ୍ଗୁକୁ ଧରିବା ପାଇଁ କଟକ କମିଶନରେଟ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଉଥିଲା। ଗତକାଲି ମଙ୍ଗୁ ଏକ ନିର୍ଦ୍ଦିଷ୍ଟ ସ୍ଥାନରେ ଥିବା ନେଇ ଖବର ପାଇ ଚଢ଼ାଉ କରିବା ସମୟରେ ପୋଲିସ ଉପରକୁ ଗୁଳି ଚାଳନା କରିଥିଲା ମଙ୍ଗୁ। ଆଉ ନିଜକୁ ସୁରକ୍ଷିତ ରଖିବା ପାଇଁ ପୋଲିସ ପାଲଟା ଗୁଳି ଚାଳନା କରିଥିଲା। ତେବେ ପୋଲିସର ଗୁଳି ମଙ୍ଗୁର ବାମ ଜଙ୍ଘରେ ବାଜିବାରୁ ସେ ଆହତ ହୋଇଥିଲା। ମଙ୍ଗୁକୁ କାବୁ କରିବା ପରେ କଟକ ବଡ଼ ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।"