ଦେବେନ୍ଦ୍ର ବେହେରା ହତ୍ୟାକାଣ୍ଡର ପର୍ଦ୍ଦାଫାସ, ତିନି ଅଭିଯୁକ୍ତ ଗିରଫ

କଟକ ଜିଲ୍ଲା ଗୋବିନ୍ଦପୁର ଥାନା ନୂଆଗାଁ ଠାରେ ଘଟିଥିବା ଦେବେନ୍ଦ୍ର ବେହେରାଙ୍କ ହତ୍ୟାକାଣ୍ଡର ପର୍ଦ୍ଦାଫାସ କରିଛି ପୋଲିସ । ଏହି ହତ୍ୟା ଘଟଣାରେ ୩ ଅଭିଯୁକ୍ତଙ୍କୁ ବାନ୍ଧିଲା ପୋଲିସ । ଅଧିକ ପଢ଼ନ୍ତୁ

ନିଆଳି:ଗତ ୨୨ତାରିଖ ଦିନ ଚର୍ଚ୍ଚିତକଟକ ଜିଲ୍ଲା ଗୋବିନ୍ଦପୁର ଥାନା ନୂଆଗାଁ ଠାରେ ଘଟିଥିବା ଦେବେନ୍ଦ୍ର ବେହେରାଙ୍କ ହତ୍ୟାକାଣ୍ଡର ପର୍ଦ୍ଦାଫାସ କଲା ଗୋବିନ୍ଦପୁର ପୋଲିସ । ଏହି ଘଟଣାରେ ସାମିଲ ଥିବା ହତ୍ୟାକାରୀ ଓ ହତ୍ୟାକାଣ୍ତର ରହସ୍ୟ ଖୋଲିଛି । ଏଥିରେ ସାମିଲ ଥିବା ୩ ଅଭିଯୁକ୍ତଙ୍କୁ ଗିରଫ କରିଛି ପୋଲିସ ।

ଅଭିଯୁକ୍ତ ମାନେ ହେଲେ ପ୍ରଶାନ୍ତ ଜେନା ଓରଫ ପସା, ବିଶ୍ୱଜିତ ମଲ୍ଲିକ ଓରଫ କାଳିଆ, ପ୍ରେମାନନ୍ଦ ଭୋଇ ଓରଫ ବାଘ । ଏଥିସହ ହତ୍ୟାକାଣ୍ଡରେ ବ୍ୟବହୃତ ହୋଇଥିବା ମାରଣାସ୍ତ୍ର ଜବତ କରିଛି । ଏ ସମ୍ପର୍କରେ ସୂଚନା ଦେଇ କଟକ ସଦର ଏସଡିପିଓ ସୁବାସ ଚନ୍ଦ୍ର ପଣ୍ଡା କହିଛନ୍ତି ଘଟଣା ଦିନ ରାତିରେ ଅଭିଯୁକ୍ତ ମାନେ ନୂଆଗାଁ ଛକରେ ଏକାଠି ବସି ମଦ୍ୟପାନ କରୁଥିବା ସମୟରେ ମୃତ ଦେବେନ୍ଦ୍ର ବେହେରା କାମରୁ ଫେରି ସେହି ବାଟରେ ଯାଉଥିଲେ ।

ଅଭିଯୁକ୍ତ ମାନେ ପ୍ରଥମେ ଦେବେନ୍ଦ୍ରଙ୍କୁ ଅଟକାଇ ଯୁକ୍ତିତର୍କ କରିବା ସହ ଘୋଷାଡ଼ିନେଇ ନିକଟରେ ଥିବା ଏକ ପରିତ୍ୟକ୍ତ କଳ ଘର ନିକଟକୁ ନେଇଥିଲେ । ସେଠାରେ ପ୍ରଥମେ କାଳିଆ ଓ ବାଘ ଦେବେନ୍ଦ୍ରଙ୍କ ମୁଣ୍ଡକୁ ଇଟା ଓ ମଦ ବୋତଲରେ ବାଡ଼େଇବା ପରେ ମାରଣାସ୍ତ୍ରରେ ଦେବେନ୍ଦ୍ରଙ୍କ ବେକକୁ ହାଣିଥିଲା । ଫଳରେ ଘଟଣାସ୍ଥଳରେ ଦେବେନ୍ଦ୍ରଙ୍କ ମୃତ୍ୟୁ ହୋଇଥିଲା ।

ଇଟିଭି ଭାରତ, ନିଆଳି