କଟକ: ୨ କୁଇଣ୍ଟାଲ ୧୦ କେଜି ଗଞ୍ଜେଇ ସହ ଜଣକୁ ଗିରଫ କଲା କଟକ ଅବକାରୀ ବିଭାଗର ଫ୍ଲାଇଙ୍ଗ ସ୍କ୍ବାର୍ଡ। କଟକର ଶିଖରପୁର ଅଞ୍ଚଳରୁ ଏହି ଗଞ୍ଜେଇ ସହ ଚାଲାଣରେ ବ୍ୟବହୃତ କାରକୁ ମଧ୍ୟ ଜବତ କରାଯାଇଛି। ଗିରଫ ଯୁବକ ଜଣକ ଭଦ୍ରକ ଅଞ୍ଚଳର ତପନ ରାଉତ ବୋଲି ଜଣାପଡିଛି। ତେବେ ଜବତ ହୋଇଥିବା ଗଞ୍ଜେଇର ଦାମ ପ୍ରାୟ ୧୦ ଲକ୍ଷରୁ ଉର୍ଦ୍ଧ୍ବ ହେବ ବୋଲି ଆକଳନ କରାଯାଉଛି ।
ସୂଚନା ମୁତାବକ, ଅବକାରୀ ବିଭାଗର ଫ୍ଲାଇଙ୍ଗ ସ୍କ୍ବାର୍ଡ କଟକ ଶିଖରପୁର ଅଞ୍ଚଳରେ ପାଟ୍ରୋଲିଂ କରୁଥିଲା। ବିଭିନ୍ନ ଗାଡି ଯାଞ୍ଚ କରିବା ସମୟରେ ଏହି ଗଞ୍ଜେଇ ବୋଝେଇ ଗାଡି ଜବତ କରିଥିଲା ବିଭାଗ। ତେବେ ଗାଡ଼ିର ଡ୍ରାଇଭର ଧରା ପଡିଥିବା ବେଳେ ମୁଖ୍ୟ ଅଭିଯୁକ୍ତ ଘଟଣାସ୍ଥଳରୁ ଫେରାର୍ ହୋଇଯାଇଥିଲା । ମୁଖ୍ୟ ଅଭିଯୁକ୍ତ ଜଣକ ରାଜୁ ବୋଲି ଜଣାପଡ଼ିଛି। ତେବେ ଏହି ଗଞ୍ଜେଇ ବ୍ରହ୍ମପୁରର ଦିଗପହଣ୍ଡି ଅଞ୍ଚଳରୁ ଭଦ୍ରକ ଚାଲାଣ କରାଯାଉଥିଲା ବୋଲି ଗିରଫ ଡ୍ରାଇଭର ଜଣକ କହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
